Nie dat gullui go artistta guoktá Ámmun Johnskareng ja Niillas Holmberg muittašeigga sámi musihkkárlegeandda Veijo Länsmana musihka ievttá eahkeda.
Lávlla «Mun ja golgoláttán» lea varra dat eanemus dovddus šuokŋa sus. Šuoŋaid vieččai son beakkán lávlagis "Me and Bobby McGee", ja čálii áibbas ođđa teavstta dasa sámegillii.
Holmberga mielas ievttá muitoboddu lei legendáralaš dáhpáhus.
– Muhto maiddái vuordimis. Goas nu han lei áigi muittašit Veijo, ja konsearta gárttai muhtun láhkai de go deaivvadeapmi musihkkárlegeanddain, Holmberg vástida.
Artihkal joatkašuvvá gova maŋŋá:
Olbmot liikojedje go besse vásihit Veijo Länsman rohki musihka.
Foto: Nils Henrik Måsø / NRKLagabui 300 olbmo ledje boahtán Jalvái Vuolle-Geavgŋái vásihit legeandda musihka.
Holmberga mielas doaluin dovdui erenoamáš vuoigŋa. Maiddái beaivváš iđistii go konsearta álggii.
– Livččii áigi ráhkadit CD
Vehá dobbelis gullui geavŋŋis šávvamin gokko Veijo Länsmann heavvanii 1974:s, dušše 23 jahkásažžan. Sus báhce ollu čáppa sánit ja lávlagat árbin maid muitokonseartta lágideaddjit gudnejahtte.
Niillas Holmberg mielaš livččii áigi ráhkadit CD Veijo Länsmana musihkas. Musihkkárlegeanda lea čállán lagabui 30 lávlaga, ja Holmberg lohká váikko iežas ge searvat CD-buvttadeapmái.
– Muitokonseartta oktavuođas lea leamaš buorre liiba hárjehallat su musihka, lohká Holmberg.
– Ealli musihkka
Váikko miella lea oahppat buot bajil, de vuos ii loga máhttit eará oasáža das.
– Su teavsttain lea muhtunlágan magiija, árvvoštallá Holmberg. Ja lasihastá:
– Eanaš jienain gullo eallin, ja don dovddat ahte lea eakti olmmoš guhte lávlu eakti vásáhusain. Das ii leat mihkkige dahkaluddan, ja deanoleagi vuoigŋa čuodjá, Holmberg vástida.
Muitalii ilgádus vásáhusaid birra
Pekka Guttorm (g.b) ja Sulo Aikio muitaleigga mo soai leaba vásihan Veijo Länsmana.
Foto: Nils Henrik Måsø / NRKVeijo Länsman duššai suoidnemánus 1974. Skihpár Pekka Guttorm Jalvvis eret, guhte lei lahkosis go lihkohisvuohta deaividii, muitalii ievttá muitokonsearttas dan ilgadis dáhpáhusa birra.
- GULDAL:
– Maiddái mu vielja lei seamma fatnasii mii gopmánii. Guktot heavvaneigga, Guttorm čilgii.
Veijo Länsman gávdnui njealje beaivve maŋŋá. Pekka Guttorm vieljarohkki ges ollu maŋŋelis.
Ráhkadii teavsttaid ovttas skihpáriiguin
Pekka Guttormas leat maid ollu buori muittut skihpára birra. Maiddái daid vásáhusaid birra beasai muitalit ievttá eahkeda.
– Lei go Veijos miige searra seremoniija mo son čálii lávlagiid ja go son čuojahii gitára, dáhtui muitodoaluid láidesteaddji diehtit.
– Na Veijo gal ii čállán ii fal ii maidige, go ii máhttán čállit. Muhto son dušše válddii gitára ja čuojahasttii ovtta távtta háválassii, ja jearralii ahte heive go nie. Ja go mii duođašteimmet ahte die de lea buorre, de vuođđudii dan. Dasto son fas jotkkii ja válddii nuppi ja nuppi távtta dassái go teaksta ja musihkka gárvvásmuvai, muitalii Pekka Guttorm reaškasii.
YLE lea bádden lávlagiid
Áile Risten Holmberg ja Hildá Länsman maid finaiga lávddis lávlumin.
Foto: Nils Henrik Måsø / NRKVeijo Länsman ii geargan goassige ráhkadit LP-pláhta iežas musihkas. Dattege YLE Sámi ovddeš journalista, Luobbal-Sámmola Sulo Aikio, lea áimmahuššan eanáš musihka maid musihkkárlegeanda lea ráhkadan. Dan son dagai muhtun mihcamarija Ohcejogas. Muitokonsearttas Aikio muitalii mo dat dáhpáhuvai.
Dát artisttat serve ievttá muitokonsearttas: Niillas Holmberg, Ámmun Johnskareng, Hildá Länsman, Annukka Hirvasvuopio-Laiti, Áile Risten Holmberg ja Hartvik Hansen.
