Bagadalli:– Lea leamaš hirbmat somá ja hástaleaddji

NRK drámáráidu «Makta» lea ožžon olu fuomášumi.

Duohtavuođa ja fikšuvnna vuođul muitaluvvo fápmogilvu, mii Bargiidbellodagas lei 1970-logus.

Dán rádjai leat guhtta oasi sáddejuvvon. Čihččet oasis muitaluvvo golbmanuppelohkái sámi nissona birra. Sin birra, geat guovvamánu 6. beaivvi 1981:s okkuperejedje stáhtaministara Gro Harlem Brundtlanda kantuvrra, Álttá akšuvnnaid oktavuođas.

Buorre vuođđu bagadallat

Dán oasi lea Elle Márjá Eira bagadallan.

Vaikko ii leat go badjelaš 40 jagi dassá go okkuperejedje Brundtlanda kantuvrra, de goitge eai gávdno olu dieđut dáhpáhusas.

Dattetge lei Elle Márjjás lihkku, go moadde jagi dás ovdal lei golbmasis dáin nissoniin dahkan filmmaža. Nu leige sus buorre vuođđu bagadallat.

– Dat lea leamaš hirbmat somá ja hástaleaddji, dadjá Eira.

Dat čuozai dovdduide, sihke alcces ja neavttáriidda.

– Oasážis neavttašit dáid nissonolbmuid maŋisboahttit, ja okta dalá nealgudeaddjiin lei maid mielde statistan.

– Dát lea dehálaš oassi historjjás, leago dan leamaš váttis oažžut ovdan?

– Juo, muhto dá lea dušše unna oasáš das mii dalle dáhpáhuvai dan jándora. Livččii dieđusge sáhttán olu eambbo muitalit, muhto dá lea vuosttažettiin ráidu Gro Harlem Brundtland birra.

Eira jáhkká ahte son bagadallin maiddái lea ožžon ovdan sámi perspektiivva. Dál sávvá son ahte geahččit váldet dan bures vuostá.

– Ja muitet ahte dát ii leat dokumentárafilbma, muhto fikšuvdna. Dat lea ráhkaduvvon dulkoma bokte, movt lea muitaluvvon.

Oassi lea easka oaidnin ládje sotnabeaivve, muhto Guovdageainnus besse odne, guokte beaivvi ovdal, juo oaidnit dan.

Dovdduide čuohcci

Berit Sarabakken lea neavttašan ovtta dan golbmanuppelot nissonis.

– Olmmoš veahá njuorasmuvvá, muhto lea seammás maid issoras.

Su lagasolbmot serve dáhpáhussii 80-logus, earret eará lei su eadni okta dán golbmanuppelohkái nissonolbmos.

– Dat lea sihkkarit olu váikkuhan sidjiide geat ledje doppe. Dat ii leat leamaš nu somá, dáidet leat juohkelágan dovddut leamaš. Munge ožžon measta diekkár dovdduid neavttašettiin.

Sarabakken lea gealdagasas go oassi čájehuvvo Guovdageainnus.

– Mun jáhkán dat lea oalle dovdduide čuohcci, moraš ja váivi soaitá.

Sotnabeaiiđida, diibmu guđa rájes sáhtát dán oasi geahččat NRK NRK TV:s. NRK1:žis ges sáddejuvvo sotnabeaieahkeda dii 19.50.