NRK Meny
Normal

Čielggadit mo lágidit máttasámegieloahpahusa

Máttasámegielas lohpidit gáiddusoahpahusa jos dal vel loahpahitge Aarporte sámeskuvlla, nu lohpida Nordlándda oahpahusdirektevra Guri Adelsten Iversen.

Guri Adelsten Iversen

Nordlándda fylkkamánni oahpahusdirektevra Guri Adelsten Iversen lohpida oahpahusa máttasámegielas mánáide geat Aarporte sámeskuvllas ožžot gáiddusoahpahusa máttasámegielas dál. Visot galgá leat čielgan čakčii

Foto: Emil Indsetviken / NRK

Nordlándda filkkamánni lohpida máttasámegielas oahpahusfálaldaga mánáide geat masset dán fálaldaga Aarportte sámeskuvllas.

Eiseválddit leat mearridan loahpahit Aarporte sámeskuvlla čavčča rájes, muhto Nordlándda filkkamánni oahpahusdirektevra lohká iežaset dál bargamin áššiin, nu ahte gáiddusoahpahus máttasámegielas joatka jos dal vel Aarporte sámeskuvla loahpahuvvo čavčča rájes.

Barget áinnas ovttas Ruoŧain

Nordlándda oahpahusdirektevra muitala ovdalge bargan ovttas ruoŧabeali skuvllaiguin. Skuvllat leat deaivvadan máŋgii, ja dalle lea giella ja kultuvra leamaš váldo. Dál leat sii guorahallamin lea go vejolaš bargat ovttas riikkarája badjel, nugo mat oahppogirje áššiin. Ruoŧas leat maid mánát geat hállet máttasámegiela, danne lea vuogas jos sáhtašii ovttasbargat.

Čakčii galgá oahpahusvuohki čielgan

Nordlándda fylkkamánni oahpahusdirektevra, Guri Adelsten Iversen, lohká čákčii galgá leat buot čielggas. Mánát ja vánhemat galget buorre áiggis, ovdalgo skuvla álgá, oažžut diehtit mo máttasámegieloahpahus galgá lágiduvvot mánáide geat ovdal leat ožžon gáiddusoahppo-fálaldaga Aarportte sámeskuvllas.