Dáiddár Hannah Claus.
Foto: APTN– Mun hálidin iešguđetlágán olbmuid searvat dása, almmáiolbmuid, nissoniid, mánáid, vuorasolbmuid. Dát guoská juohkehažžii servodagas. Filmmas maid lean ráhkadan čájehan mo nissonnamat čállojit badjebadjálagaid, eanet aht`eanet namat. Viesut mat oidnojit filmmas ges muitalit daid nissoniid birra geat eai boahtán goassege ruoktot, čilge dáiddár Hannah Claus.
Čájáhus lea eamiálbmotnissoniidda gudnin geat fáhkka ja vearrivuođa dihtii leat šaddan guođđit dán máilmmi.
1200 nissonolbmo jávkan
Čieža nissondáiddára bovdejuvvojedje ráhkadit dáidagiid Kanáda eamiálbmotnissoniid surgadis vuorbbi birra. Jagi 1980 rájes leat eanet go 1200 eamiálbmotnissona fáhkkestaga jávkan ja maŋŋil gávdnon goddon.
Unnán áššit čovdojuvvojit.
Hannah Clausa dáidda čájeha oktavuođa dáid nissoniid ja servodaga gaskkas. Dáiddár bivddii olbmuid čállit nissoniid namaid.
(Ášši joatkašuvvá gova vuolábealde)
Dáidagis leat garra muitalusat. Eamiálbmotnissoniid jávkan leage olu morraša buktán bearrašiidda.
Foto: APTNČájáhusordnejeaddji Sylvie Pare hálidii čájáhusain bidjat fuomášumi daid iešguđet jávkamiidda maid eamiálbmotnissonat leat šaddan gillát áiggiid čađa.
– Dáidagis mii gohčoduvvo «Institutionalized disappearance» oaidná dehálaš nissoniid namaid geat leat váikkuhan servodaga ovdamearkka dihtii čállima ja diktema bokte, muitala Pare.
Dáidagat muitalit olu jávkanáššiid birra. Muhto erenoamážit okta jápmin lea guovddážis. Eamiábmotnissona Loretta Saundersa rupmaša gávdne čihkkojuvvon hockeyveaskku sisa.
– Dát lea dat buot vearrámus ášši. Loretta Saunders goddui dan beaivvi go lei sáddemin 23.000 vuolláičállaga maid lei čohkken maŋŋel go lei čađahan dutkama goddon ja jávkan nissoniid birra, čilge Sylvie Pare.
