– Dát lea vealaheapmi

– Dát lea njuolgut vealaheapmi, lohká Gurutbellodaga stuoradiggeáirras Vera Lysklætt go sámi mánáin eai leat sámegiel oahpponeavvut.

Vera Lysklætt, (V)
Foto: Sigurdsøn, Bjørn / SCANPIX

Ikte logai son riikaviidosaš digaštallansáddagis sámi oahpponeavvuid birra, ahte lea dohkkemeahttun dilli sámi skuvllain ja ahte vealaheapmi ii leat beare garra sátni geavahit dán oktavuođas:

GULDAL: – Sámi mánát vealahuvvojit

Sámi mánáid oahpponeavvuid dilli lea riikkaviidosaš beroštumi boktán mannjil go šattai dovddusin ahte ii oktage girji leat ráhkaduvvon maŋŋil maŋimuš oahpporeforpma Máhttoloktema 2006:as.

Ievttá Dagnytt18 sáddagis čujuhii Lysklætt Sámedikki ovddasvástádussii oahpponeavvodilis. Muhto son maiddái muittuha ahte bajimus ovddasvástádus lea Máhttodepartemeanttas.

Lysklætt maid lohká iežas váldán oktavuođa Máhttodepartemeanttain máŋgii dan áigodagas go lea leamaš Stuoradikkis. Son ii loga departemeantta váldán ovddasvástádusa duođalaččat.