Dál áiggušii Ballo hehttet Sámediggái addimis lasi dadjámuša, go Norgga Sámediggi goazaha ovdáneami, su mielas.
Olav Gunnar Ballo ii dattetge oaivvil ahte Sámediggi lea hehttehussan buot áššiid oktavuođas.
Muhto áššiide maidda leat ožžon beare ollu dadjámuša ja fámu, lea nugo minerálaid ohcama oktavuođas.
– Eambbo dadjamuš go earáin
Su mielas lea dát badjelmearalaš. –Jus galgá leat eambbo dadjámuš go earáin Finnmárkkus ovdamearkka dihte áššiide mat gusket daid nugočoduvvon sámi ealáhusaide, de berrejit dat leat čielga sámi ealáhusat, ja dieđus maid go lea sáhka čielga sámi kultuvrras.
10 % jienasteaddjiin
Jus Finnmárkku álbmot galgá čuovvut dan máid Sámediggi dadjá, de dat goarida diehttelasat eará ealáhusovdánemiid. Dat lea áibbas boastut Ballo mielas, go Sámedikki jienasteaddjit han leat dušše 10 % filkká álbmogis.
Dál leat jo ollugat cealkán ahte eai sáhte Finnmárkui ásahit ja álggahit maidege, go Sámediggi beassá mearridit ollu eatnamiid badjil ovdamearkka dihte.
– Alo bargan vuostá
Sámediggepresideanta Egil Olli gal ii hirpmáhuva go Ballo cuiggoda sin. – Son lea dieđusge ovtto bargan dan ahte Sámediggi ii galgga oažžut váikkuhanvejolašvuođaid.
Muhto mun in leat gal ovttaoaivilis suinna, go Sámedikkis ii leat nu stuorra váikkuhus, vaikke das berrešii leat eambbo váikkuhus go dál lea, oaivvilda presideanta Egil Olli.
Olav Gunnar Ballo ii loga dohkkehit ahte Sámediggi áigu vel eanet fámu, ja lohka fertet čálmmustahttit práktihkkalaš ovdamearkkaid váikkuhusaide.
