NRK Sámi oaiviliskkadeamis vástidit 67 proseantta jienasteddjiin ahte presideanta galgá máhttit sámegiela. 25 proseantta vástidit ahte ii dárbbaš máhttit sámegiela ja 8,5 proseantta eai diehtán dahje sis ii lean oaivil dán birra.
Ovttaoaivilis jienasteddjiiguin
Sámedikki presideanta Egil Olli lea ovttaoaivilis jienasteddjiiguin ahte presideanta galgá máhttit sámegiela. Son gal ii lean vuolgit presideantan iige evttohassan jos ii lean máhttit sámegiela.
– Na mu mielas livččii hui ártet jos sámedikki presideantta ii hálddaš sámegiela, aŋkke njálmmálaččat, lohká Olli. Su mielas livččii lossa gulahallat sámi álbmogiin, jus ii máhte sámegiela.
Ii hálit duvdit eret ovttage
Oaiviliskkadeami logut čájehit ahte leat eanaš dat nuoramus ja boarraseamos jienasteaddjit geat oaivvildit ahte lea dehálaš ahte presideanta máhttá sámegiela.
Sámedikki presideanta Egil Olli lohká ahte son ii hálit duvdit dárogielagiid searvamis presideantaevttohassan.
– Munnje livččii hui ártet jos in livčče máhttán sámegiela, danne go šaddá hui olu gulahallat sámegillii sápmelaččaiguin. Sámegiella lea maid ovttasbargogiella Sámedikkiid gaskkas. Mu mielas lea maid dehálaš buktit iežan oainnuid ja vásáhusaid iežan barggus.
