Anne-Grethe Njuolla
Foto: Nils Henrik Måsø / NRK
– Ovddádusbellodat čájeha badjelgeahččanvuođa nissonolbmuide, oaivvilda Unjárgga gielddastivrraáirras Anne-Grethe Njuolla.
Earret eará dán geažil lea son dál dieđihan iežas eret Ovddádusbellodagas.
Vigge bágget
Maŋemuš gielddaválggain oaččui Unjárgga Ovddádusbellodat guokte gielddastivraáirasa. Dál lea Jarle Andreassen báhcán okta maŋŋel go Anne Grethe Njuolla geassádii. Son ii loga gal leat váttisin ovttasbargat Jarle Andreasseniin, muhto dovdá iežas liikká badjelgehččojuvvon.
– Dat mii duođas suhttadii mu, lei go vigge bágget jienastit vuostá ásaheames ođđa bajásšaddanguovddáža Unjárgii, dadjá Njuolla.
Maiddái Mátta-Varjjagis lea okta fásta ja guokte várrelahttu cealkán ieažaset eret Ovddádusbellodoagas maŋŋel go leat dovdan badjelgeahččanvuođa.
Máŋggas vásihan
Gielddastivrraáirras Liv Mikkelborg lohká lossadin leat nissonolmmožin Ovddádusbellogas.
Laila Davidsen Ovddádusbellodagas
Foto: Nils Henrik Måsø / NRKSeamma dovddaha maiddái Ovddádusbellodaga fylkkadiggeáirras, Laila Davidsen.
Gieskat dieđihii Davidsen ahte ii hálit šat leat Álttá Ovddádusbellodaga stivralahttu. Dát mielddisbuvttii ahte Davidsen čievččastuvvui maiddái eret Finnmárkku ovddádusbellodoga nubbinjođiheaddjin. Su sadjái biddjui baicca dievdoolmmoš Terje Hansen.
Vaikko Finnmárkku Ovddádusbellodaga jođiheaddji Ronny Berg biehttala ahte sii bellodagas badjelgehččet nissonolbmuid oainnuid, de aŋkke áigot guovvamánu jahkečoahkkimis geahččat movt sáhttet buoridit siskkáldas gulahallama.
