Gáivuona Sámepolitihkalaš lávdegotti čoahkkimis ikte evttohedje čavget sámegiel geavaheami suohkanis. Lávdegotti jođiheaddji Karin Karlsen lohká áigi ahte suohkana sámegiellagat sáhttet sámástit, nu go sidjiide lea lunddolaš.
Álbmotjienasteame áššis
Ovdal Sámepolitihkalaš lávdegotti čoahkkima, leat searvvit ja suohkana ossodagat buktán árvalusaid mo rievdadit dahje buorit Gáivuona guovttegielat suohkanin.
Gáivuona Ovddadusbellodat lei buktán árvalusa ahte lágidit álbmotjienateami galgá go suohkan leat guovttegielat ja dasa lassin ahte suohkana dáru namma galgá boahtit ovdalii sámi nama. Dán ii meannudan Sámepolitihkalaš lávdegoddi go dát ii guoska dán áššái.
Árvvoštallat dárbbu
Suohkana suohkankássa ja fágassearvi KFO ges ledje buktán evttohusa ahte ossodagat galget ieža beassat árvvoštallat leago dárbu sámegielgelbbolašvuođa ossodahkii. Dán árvalusa ii čuovvolan lávdegoddi ja deattuhii mearrádusas ahte buot suohkana ossodagain galgá leat sámegielat gelbbolašvuohta.
– Diekkár árvalus ii leat dohkálaš go mii han galgat ovdánahttit sámegiela ja kultuvrra dán suohkanis, deattuha jođiheaddji Karin Karlsen.
Ii Riddu Riđui ruđa
Okta fágasearvi suohkanis, KFO cuiggoda maid go suohkan juolluda 100.000 ruvnno Riddu Riđu festiválii, ja árvalit ahte dát supmii ii berre lasihuvvot.
Sámepolitihkalaš lávdegoddi ii váldán vuhtii dán cuoiggodeami ja jođiheaddji, Karin Karlsen čilge ahte Riddu Riđđu lea leamaš mielde lokteme sámegiela geavaheami suohkanis ja dasa lassin maid eanet beroštumi sin sámi kultuvrrii.
Guovttegielat čoahkkimat
Sámepolitihkalaš lávdegoddi árvala maid ahte okta suohkanstivrračoahkkin berrešii leat guovttegielat. – Dat ealáskahttá maid politihkariid sámegiel geavahama ja dát soaitá daguhit ahte muhtun politihkárat sámástišgohtet, jáhkká Karin Karlsen.
Sámepolitihkalaš lávdegotti ievttá čoahkkima mearrádus galgá meannuduvvot vuos ovdagottis ja lea Gáivuona suohkanstivra mii loahpalaččat dohkkeha dahje hilgu árvalusaid, muhto Karin Karlsenis lea buorre doaivva ahte ovdagoddi ja suohkanstivra čuovvolit sin árvalusaid go lea ávkin hálddáhussii ja ássiide.
