Lávvardaga lei loahppavuorru Norgga Melodi Grand Prixas, ja doppe vuittii sámenieida ja unjárgalaš Agnete Johnsen álkit lávlagiin «Icebreaker». Dál galgá son ovddastit Norgga, European Song Contesta semifinálas.
– Son lea álo leamaš das go mun lean leamaš vuolemusas ja lean dárbbašan su doarjaga, dadjá Malin Elisabeth Olsen ja njuorrasa. Son lea hui rámis go Agnete vuittii.
Olsen lei diehttalasat bárisin Oslo Spektrumas go su ustit álkit vuittii daid eará čeahpes artisttaid badjel. Loahpa loahpas oaččui son váile 167 000 jiena, ja dat gii šattai nubbin oaččui 88 000.
Agnete leage ieš muitalan ahte «Icebreaker» lea persovnnalaš lávlla su lagas ustiba birra, guhte maiddái lea rahčan dego son ieš, lea rahčan psyhkalaččat. Danin journalisttat jearahallagohte Malina maiddái maŋŋel gilvvu. Ja son gal vástidii roahkkadit.
Lávlla persovnnalaš váttisvuođaid birra
– Lea earenoamáš somá go Agnete háliidii mu birra čállit lávlaga. Vuosttaš geardde go gullen dan, de gal njuorrasin nu ahte gatnjalat golgagohte vel. Lávlla lea juste nu movt galgá leat, dadjá Malin Elisabeth.
– Mo lea go olles Norga beasai dáinna lágiin gullat du váttisvuođaid birra?
– Lea dieđusge oalle erenoamáš, go in han mun leat mihkkege beakkálmasaid, muhto lea hui somá go háliidii mu birra čállit ja ahte mun mearkkašan Agnetii seamma olu go son munnje.
– Mearkkaša hui olu beassat ovddastit Norgga, Eurovision Song Contestas. Mus lea álohii leamaš niehkun johtit máilmmis iežan musihkain, ja dál dat ollašuvvá dat niehku, dadjá Johnsen.
Ii lean álki
Vuoiti ieš vuige ahte ii lean álki lávlut loahppagilvvus.
– Lean dovdan garra dovdduid, lean maid leamaš hui šlundon ja viggen muittohallat daid lossa dovdduid go lávlon. Ii lean álki muhto dál dat gal manná bures, geahčes beare gos mii dál leat, dadjala Agnete movttegit ja jitnosit.
– Dát lea stuorra dáhpáhus, Malin mearkkaša munnje nu olu.
Malin nivkala ovttaoaivilis ja lohká leat mearehis somán dán vásihit iežas buoremus olbmáin.
Njuorrasa go oaidná ja gullá
– Go Agnete duođaid háliida juoga de don son gal nagoda. Mun nu njuorrasan go oainnán ja gulan man čeahppi son lea. Mus golgagohtet gatnjalat dušše smiehttat dan birra, dadjá Malin.
Ii dáidde leat eahpádus gii lea lávddi duohken Stockholmmas Eurovision Song Contest semifinálas.
– Na mun sávan ahte Malin vuolgá fárrui, lohká Agnete, ja skibir nivkkuha movttegit.
– Dál moai gal fertejetne dakkaviđe tiŋgot bileahtaid. Šaddá nu somá ja don gal vuoittát olles gilvvu, dadjá Malin mojonjálmmiid.