– Jus sån ij lim, de ij lim mige

• Les på norsk: – Hadde det ikke vært for ham, da hadde det ikke vært noe

–Sån ålov merkaj sámijda ja sáme histåvrråj Viestarálan. Jus Johan Borgosav ierit sihkkop, de ij la mige. Sån aj munji persåvnålattjat ålov merkaj nav vaj uddni máhtáv mihá liehket sábmen, ja duostav gápptáj tjágŋat.

Dav javllá Viestarála ja birás sámé siebre åvddåulmusj Håvard Nija Lynghjem gå historihkkár ja girjjetjálle Johan Borgos oattjoj Språklig samlinga girjálasjvuoda guddnebálkáv ávvobåttån Suorttán bierjjedagá girjes Samer ved storhavet.

• Lågå aj: Bekymret for motstand mot samiske stedsnavn i Sortland

Tjálalasj dárogiella gudneduvvá

Girjes massta de Johan Borgos la guddnebálkáv oadtjum, gåvåt moattelágásj ulmusjjuohkusijt Viestarálan ájgij tjadá, gåktu ulmutja lij iellemav hiebadahttám, juogu dal gáldo gåhttju sijájt várresábmen, márkásábmen jali merrasábmelattjan.

– Dáv guddnebálkáv majt Borgos oadtju la guddnebálká suv tjállemvuoge diehti gå tjálalasj dárogielav adná mij buojkudahttá gåktu dåhkki avtav aktisasj dárogiela tjállemgielav dahkat Vuonarijkan. Ja dav de Johana girjen gávnnap, subtsas Thomas Hoel guhti jådet Landslaget for språklig samling.

• Lågå aj: Behov for språksenter i Vesterålen også

– Ballát jus lidjiv dáv diehtet

Dát girjje l 15. girjje gånnå Johan Borgos sáme histåvråv Viestarálan tjalmos.

Borgos la ávon gå de viesádijda Viestarálan dá suv girje la ávkken, ja ávkken dan láhkáj aj vaj muhtema duossti ietjasa duogátjav ilmodit, ja duossti ja sihti dagu gápptáj tjágŋat.

– Gå de dájt girjijt tjállegåhtiv, de ittjiv åvvånis diede goabbelij dát manáj. Lidjiv ballát jus lidjiv dáv diehtet, tjajmat guddnebálká vuosstájvállde.

Ja Johan Borgos la mierredam ij desti ienep girjijt tjállet, valla dættot arvusmahttem la ájnas, ja dav guddnebálkáv majt oadtjum la, de vájbi fámojt ájn vaddá joarkátjit.

• Lågå aj: To bykommuner har nå fått samiske navn

Gijttevattja

Gijttevasj viesát ja sáme jådediddje dættot Johan Borgosa barggo l vuojnojt ietjájduhttám, ja dádjadusáv viesádij gaskan ietjájduhttám.

– Jus vuogas láhkáj sidá viessot, viertti ietjat lávllagijt lávllot, ietjat subttsasijt åvddånbuktet, bessat subtsastittjat guhti ajtu le, javllá Viestarála ja birás sáme siebre åvddåulmusj Håvard Nija Lynghjem, ja professåvråv Per Fuggelirávgge bágojt mujttal.