Amalien voestes sïlle Saemiedigkesne
Amalie Hansen Kristiansen Raste (22) Loabákvuotneste guhkies jïh gieltegs våhkoem vuertiemisnie åtna.
– Govleme gaajhkijste manne joekoen baahkes, vïenhtem manne ånnetji stresse-bïevestem.
Voestes göökte biejjieh dan leah gellie tjåanghkoeh.
Vihkeles gaajhkh bïevnesh meatan åadtjodh don stoerre biejjien åvtelen.
Orre politihkerh tjuara dållebïhkedimmiem lïeredh, men aaj maam barkijh darjoeminie jïh bïevnesh gåetien bïjre.
Gaskevåhkoen 10. Saemiedigkie rïhpesti.
Jïh gaajhkh barkijh lea fuehpies Saemiedigkiem bïssedh guktie gåetie gæjka.
Gellie domtesh.
Daate voestes aejkien Amalie lea Karasjohkesne jïh Saemiedigkesne.
Dan åvteste lea ryöjredamme juktie gaajhke edtja perfekte årrodh.
– Manne gaajhkh Saemiedigkie-rïhpestimmieh TV:sne vuartasjamme juktie daase ryöjredidh.
Amalie nööremes gaajhkijste Saemiedigkien tjirkijijstie.
Dïhte tjirkije stööremes krirresne Nöörjen Saemiej Rïjhkesiebrie.
Ij leah guhkiem saemiepolitihkesne orreme, jïh jïjtjemse gihtjeme: «Leam nuekie saemie?».
– Idtjim saemien kultuvrem mov bïjre utnieh, jïh lim ov-seekere dan åvteste idtjim maehtieh saemiestidh jïh idtjim gaptam utnieh.
– Jïh govlim jeatjah “daarojste” manne nåake saemie jis idtjim låavthgåetesne årroeh, joejkh jïh saemesth.
Mohte Fovsen-aksjovnine 2023 jienebh almetjh råaki mah seammalaakan ussjedin jïh damtin goh satne.
– Manne dan jååhkesjamme damtim.
Dellie eajhnadovvi satne sïjhti Saemiedigkien sïjse båetedh.
– Gosse manne lim noere, dellie lim almetjem goh manne daarpesjamme Saemiedigkesne. Jïh daelie daate manne.
Pulse læsseneminie, daelie tjuara minngemes sïlpem tsaekedh, juktie dallegh rïhpestimmie aalka.
– Aavodem abpe Nöörjen aajjam råakedh.
Medtie 100 geerjene maanah Saemiedigkien ålkoelisnie vuertieminie.
Saeviegidie saeviehtieh gosse bïjlh båetieh.
Gånka Harald jïh Kråvnaprinse Haakon rïhpestæmman båateme Karasjohkesne.
Rïhpestimmie lea Stoerretjåanghkoesavkesne, jïh dovne Gånka jïh jienebh håaloeh.
Amalie ussjedamme dïhte ellen gieltiegommes sjædta.
– Vööjnim jeatjah almetjh sveadadin, jïh manne aaj sveadadim. Jeenjesh aaj jeehtin sijjieh orrijin voejngehtidh gosse gånka bööti.
– Man hijven! Manne tjahkesjeminie Gånka Haraldem jïh Kråvnaprinse Haakonem vuartesjeminie. Ussjedim: Im åadtjoeh “starstrucked” årrodh.
– Enn jis kamera mov vööste båata gosse tsåahkese vuartesjem?
Daelie voestes våhkoe gaervies.
Amalie maahta Gånkam jïh Kråvnaprinsem vuejnedh gosse tjïehtjelasse båetiejægan.
Doh båetijen nieljien jaepieh Amalie edtja Soejkesje- jïh finansemoenehtsisnie Saemiedigkesne barkedh.
Edtja staatebudsjehtine, gaskenasjonaale soejkesjigujmie jïh reaktajgujmie barkedh.
Jïh Amalie madtjele daejnie.
– Akte mov vaajmoeaamhtesijstie, saemienreakta, daelie leam madtjele.