NRK Meny
Normal

– In jáhke iežan goit vásihit rievdadusaid

Iešjohtleagi oasehasaid beroštusovddasteaddjit leat odne ovddideamen iežaset vuoigatvuođagáibádusaid Finnmárkku kommišuvdnii. Iešjohtleagi searvvi ovddasteaddji Nils Sverre Eriksen ii gátte iežas agis gal vásihit rievdadusaid, muhto lea oalle optimistalaš ja doaivu boahtte buolvva dan dahkat.

Nils Sverre Eriksen

– Min gáibádusat eai dahkko duohtan mu eallenagis gal, gáddá Nils Sverre Eriksen

Foto: Piera Balto / NRK

– Mii gul gáibidat geavahanvuoigatvuođa ja mátkkoštanvuoigatvuođa. Na, diet leat dat guokte oaivečuoggá. Nu mo odne lea, de lea tuiskalaččain ja spánskalaččain seamma meahcástanvuoigatvuohta go mis, dadjá Eriksen. Son lei okta dan golbmasis geat ovddastedje Iešjohtleagi searvvi Finnmárkku Kommišuvnna čoahkkimis otne.

– Ollu bargu

Finnmárkku kommišuvnna jođiheaddji, Jon Gauslaa, árvvoštallá iežaset geavahit ain jo jagi vel Kárášjoga guovllu čielggadanbargguide, go lohká daidda gullat nu ollu beliid mat váldet áiggi.

Finnmárkku kommišuvnna jođiheaddji

– Unjárgga gilisearvvi ášši čužžeheapmi ii váikkut sin dála bargui, muhto go das celkoš duopmu, de sáhttá leat váikkuheaddjin, dadjá Gauslaa.

Foto: Piera Balto / NRK

Gauslaa lohká bargun leat dás duohko vuos systematiseret daid dieđuid maid sii leat ožžon dáid gulaskuddančoahkkimiin ja daid buohtastahttit dieđuiguin maid sii ieža leat roggan, ja sis dat han galgá vel okta gulaskuddančoahkkin golggotmánus.

Makkár vejolašvuohta lea du mielas vuoigatvuođagáibideaddjiin olahit doarjaga kommišuvnnas?

Finnmárkku kommišuvdna

Finnmárkku kommišuvdna: Ole Henrik Magga, Jon Gauslaa, John B Henriksen, Hilde Agathe Heggelund ja Veronica Andersen

Foto: Piera Balto / NRK

– Lea vuos menddo árrat diesa sáhttit dadjat maidege. Ferte vuordit maid raporta de dajaš.

– Eanet gáibádusat

Gauslaa muitala dán guovllu gáibádusain leat muhtumat veahá earáláganat go dan maid leat vásihan dán barggus muđui Finnmárkkus, muhto dáppe leat mealgat eanet gáibádusat ja eanet gáibádusat seamma guovlluide, mii dagaha ahte sii šaddet geavahit eanet áiggi árvvoštallat daid mat leat vuostálaga.

Son rehkenastá ain jo jagi ádjánit dáinna bargguin.

Coahkkimis ledje valjis guldaleaddjit

Čoahkkimis ledje valjis guldaleaddjit

Foto: Piera Balto / NRK