– Jus dát livččii leamaš Kárášjoga ja sin sátnejođiheaddji Kjell Sæthera hálddus, livččii dat áigá juo jođus. Sámediggi livččii áigá juolludan ruđaid ja departemeanttat livčče maid áigá juolludan ruđa, dadjá Solbakk.
Prošeavttain áiggoše ásahit luossabivdo- ja johkasámi kulturguovddáža Detnui. Ovddeš stivrrenjoavku lea badjel jagi áigi geigen plánaid gildii vai sáhttet ohcagoahtit ruđaid. Seammás gielda ásahii ođđa stivrenjoavkku mas sátnejođiheaddji Frank Ingilæ lea jođiheaddjin.
– Dát lea njulgestaga šaddan heahpadin, dadjá Solbakk.
Ievttá ođassáddagiin Norgga Sámedikki várrepresideanta Laila Susanne Vars, geažuhii ahte Sámediggi gal lea gárvvis juolludit ruđaid beare Deanu gielda sealgá sáddet ohcamuša.
Sátnejođiheaddji Frank Ingilæ ii sáhte vástidit goas gielddas lea sáddenládje ohcamuš:
– Eat leat vel ohcan dan geažil go eai leat vel nagodan mearridit mii guovddáža sisdoallu galgá leat, muhto guovtti jagis mis lea gelbbolašvuođaoassi gárvvis, dadjá Ingilæ.