NRK Meny
Normal

– Čoavddus guohtonriidui

Vuohpošnjárgga dahje Bringneshálvøya guohtonriidui sáhttá dál leat čoavddus. Nu doaivu doaibmi filkkamánne Tor Stafsnes.

Tor Stafsnes
Foto: Fredrik Norum / NRK

Nu lohká son maŋŋá ievttá soabadallan čoahkkima mas ledje áirasat boazodoalus, eanadoalus ja Poršáŋggu gielddas.

Stafsnes lea jođihan dáid soabadallamiid 2005 rájes.

– Lága bealis leat buot eatnamat Finnmárkkus boazoguohtun eatnamat, muhto de gávdnojit ain guovllut mat leat ráfáidahtton boazodoalu vuostá, lohká Stafsnes.

GULDAL: Vuohpošnjárgga guohtonriidu

Ráfáidahtton eatnamiin riidu

Stafsnes muitala ahte go ráfáidahttimat galge eret váldot, de čužžehii dát garra vuostehagu Álttás ja Poršáŋggus, ja daidda šadde sii geahčadišgoahtit báikkálaš čovdosiid, nu go Poršáŋggu Vuohpošnjárgii ja Njárggahuožžii.

Mearri boazolohkui

– Vuohpošnjárga galgá ain leat ráfáidahtton boazodoalu vuostá ja dál leat soahpan álggahit máŋggadoaimmat plána maid ovddasteaddjit boazodoalus, eanadoalus ja gielddas galggašedje hábmet nu ahte sihke eanadoallu ja boazodoallu sáhttet ovttas birget guovllus.

Reinsdyr i saueflokken.
Foto: Per Nikolai Solheim

Dasa lassin lea maid daddjon ahte dás duohko galggašii guorahallat olles Vuohpošnjárgga guohtunárvvu, vai buorebut dieđášedje maid guovlu gierdá. Dalle easkka livčče vejolaš mearridit modealla guvlui mii luoittášii maiddái boazodoalu viissis logu bohccuiguin beassat dohko, ja dušše viissis áiggi, lohká Stafsnes.

– Guhkálaga Njárggahuoš áššis

– Dat nubbi riiddugaskaoapmi Poršánggus, namalassii Njárggahuoš dahje Oldereidneset, dasa gal ii oro vuos mihkkege čovdosii gávdnomis, go dohko eai hálit oppanassii ge luoitit boazodoalu ja dalle bisuhuvvo ráfáidahttin boazdoalu vuostá, lohká Stafsnes.

Doaibmi boazodoallohoavda Stig Gøran Hagen ii hálit vuos maidege dadjat dieid soabadallamiidda mat leamaš, ja iige dasa ge maid filkkamánne oaivvildeaš áššis.