Hopp til innhold

Korte nyheter

  • Stuorámus eananmáhcaheapmi California historjjás

    Californias guvernevra Gavin Newsom lea máhcahišgoahtán eatnamiid Shasta Indian Nation eamiálbmogii. Dan čállá Los Angeles Times áviisa.

    Shasta Indian Nation lea Amerihkás eamiálbmot geat gullet Klamath-váriide Californias. Sin eatnamat leat duoguštuvvon ja dulvaduvvon čuođi jagi áigge.

    Dan 28 njealjehaskilomehteris mas lea sáhka lea oassin barggus ahte jávkadit Klamath-joga buođuid. Mihttun lea rahpat čázádaga ja das sihkkarastit badjelaš 48 miilla guhkkosš luossaguovllu.

    - Oassin stáhta geatnegasvuođas lea dahkat buorádusa indiánačearddaide, geat dán leat atnán iežaset ruoktun guhkit go olmmoš sáhttá muitit, dajai Newsom cealkámušas.

    Dá lea viđát jahki go California almmolaččat bivdet ándagassii stáhta historjjálaš doaimmaid ovddas. Háliidit dikšut čiekŋalis háviid ja hukset luohttevašvuođa.

    Shasta India Nation áigu Fish and Wildlife ja California Natural Resources Agencyin ovttasbargat lága mielde máhcahit eatnamiid.

    Iron Gate Dam i Klamath River er blant demningene som skal rives
    Foto: Gillian Flaccus / Associated Press
  • Eahpeluohttámuš klinihkkahovdii

    Les på norsk

    Vuossárgga celkkii Sámi doaktáriid searvi ahte sis lea eahpeluohttámuš Sámi klinihka hovdii Amund Peder Teigmo:i. Dan čállá Ságat.

    Eahpeluohttámuššii leat moadde siva, earret eará go klinihkka ain gullá Finnmárkkubuohcceviesu vuollái.

    – Vássán njealji jagis lea Sámi doaktáriid searvvi čuvvon mielde makkár ovdáneapmi lea. 21,3 proseantta bušetterejuvvon virggiin leat deavddekeahttá. Dát proseantalohku lea beali stuorátgo eará klinihkain, mat gullet Helse Nord vuollái.

    Dan dadjá Sámi doaktáriid searvvi jođiheaddji Jonill Margrethe Fjellheim Knapp áviisii.

    Nubbi ášši mas doavttersearvi lea fuolas, lea ahte máŋga fágaolbmo ja bargi leat heaitán dán njealji jagi áigodagas.

    Klinihkkahoavda Teigmo lea ožžon dieđu moaitámušaid birra. Son čujuha oanehaččat daidda virggiide mat leat ásahuvvon. Dađi eambbo ii háliit dadjat. Son čujuha Finnmárkkubuohcceviesu gulahallanhovdii, Eirik Palm.

    Bearjadaga bođii ođas ahte Sámi klinihkka Kárášjogas oažžu njeallje ođđa virggi.

    Amund Peder Teigmo
    Foto: Nils John Porsanger / NRK
  • Sámi speallu vuosttažin App Stores

    Ándaras ja njoammelčivggat» mánáidspeallu mii almmuhuvvui geassemánu 17. beaivvi, lea vuosttaš sajis «Bearaš» kategoriijas ja nuppi sajis «Máinnas» kategoriijas spealuin, maid ovddas šaddá máksit.

    Speallu lea 12. sajis App Store spealuin, mat leat oastin láhkai.

    John Anders Sikku, gii lea ráhkadan spealu, dadjá ahte sutnje čájeha dát dárbbu álbmoga gaskkas dákkár lágan spealuide.

    – In lean veahášge vuordán ahte ná bures manai, ledjen vuordán ahte dál lean almmuhan ja dál ii gullo šat mihkkege dan birra, dadjá Sikku.

    Ándaras ja njoammelčivggat mánáidspeallu
    Foto: Jonne Sikku