Kárášjoga gieldda dárkkistanlávdegoddi lea guorahallan masa gielda lea geavahan 2,5 miljovnna ruvnno maid ožžo veahkehit Utøya gillájeddjiid. Odne almmuhedje rapporta, mas boahtá ovdan ahte gielda dušše lea geavahan 417 000 ruvnno. Masa badjel 2 miljovnna ruvnno lea geavahuvvon, dan ii sáhte gielda duođaštit.
Eeai leat ožžon veahki
Ráđđeolmmái lea sierra rapportas ovdal čuoččuhan ahte gielda lea geavahan 2,6 miljvonna ruvnno veahkehit dan 12 nuora geat vásihedje terrora Utøyas. Seammás leat nuorat muitalan ahte eai oaččo dan veahki maid dárbbašit.
Ráđđeolmmái Elfrid Boine ii dáhto odne kommenteret gosa dat ruđat leat šaddan, muhto lea ovdal dadjan ahte son váldá ovddasvástádusa jus ruđat eai leat geavahuvvon riekta.
Beahtahallan
Utøya nuoraid ovddasteaddji, Ingeborg Larsen lea hirbmasit beahtahallan gieldda badjel, ja vuordá ahte dát ruđat jođaneamos lági mielde geavahuvvojit dasa masa dat álgo álggus lei jurddašuvvon, nammalassi veahkehit nuoraid.
Badjeláiggi máksán
Revišuvdna rapportas boahtá ovdan ahte gielda lea geahvan 417 834 psykososiála doaimmaide. Dán supmis lea 332 581 ruvnno mannan máksit badjeláiggi gieldda bargiide. Dat mearkkaša ahte dušše 85 253 ruvnno lea mannan njuolga nuoraide.
– Obbalaččat sáhttá dadjat ahte Kárášjoga gielda ii leat čoavdán dán nu bures, dadjá dárkkistanlávdegotti Ingvald Laiti.