Kristin Harila heaitá ohcamis jápmán olbmá Tibetas
Ánnejohkalaš Kristin Harila fertii heaitit ohcamis iežas jápmán olbmá Tenjen Lama Sherpa, gii duššai uđđasii Shishapangma-váris Tibetas diibmá.
– Mis leat leamaš garra ohcanbeaivvit dáppe Tibetas. Mii leat dáđibahábut oaidnán ahte dál ii leat vejolaš ohcat Gina ja Lama uđasbáikkis, ja mun lean jođus ruovttoluotta Katmandui, čállá Harila Instagramas.
Tenjen Lama Sherpa lei okta máilmmi buoremus várregakcuin.
Son lei veahkeheamen Amerihká gakcunjoavkku goargŋut Shishapangmai go son, su mielgakcu Mingmar Sherpa, amerihkálaččat Gina Marie Rzuccino ja Anna Gutu gevve muohtauđđasii golggotmánu 7. beaivvi diibmá.
Harila ja earát leat ohcan dál birrasiid 7500 mehtera allodagas, doppe gos gávdne sin biergasiid.
– Na, maid dál dahket viidáseappot? Mun in leat sihkkar. Juste dál de áigut juogadit buot dieđuid mat mis leat dáinna guvttiin guoskevaš bearrašiin, vai sii sáhttet mearridit galgat go mii fas geahččalit ođđasit boahtte áigodagas, čállá Harila viidáseappot.
Sus lei Tenjen Lama Sherpa lagamus mielgakcu go son goarkŋui máilmmi 14 alimus várrái 92 beaivvis diibmá.