LKAB háliida ahte Ufuohtabána ii fievrrit olbmuid
Dán dálvvi leat máŋga toga čálistan ruovdemáđis eret, ja togat eai leat mannan guhkit áiggiid Davvi-Ruoŧa málbmagávpoga Girona ja Davvi-Norgga Áhkánjárgga gaskka.
Dál evttohit ruvkefitnodagat Gironis ja Bajilis, LKAB ja Kaunis Iron, ahte eai fievrrit olbmuid Ofuohtabánas ja Málbmabánas doaibmanávccaid geažil.
Dan čállá Fremover-áviisa.
Girona málbmavuorkkát leat dievvan dálvvis, ja devdet 600 toga, čállá áviisa.
LKAB-hoavda Jan Moström dadjá SVT:i ahte sii evttohit dán vai olbmot eai šatta barggu haga. Seammás háliidit geahpedit buvttadeami Gironis. Álggos geahpedit sullii miljovnna tonnain jahkái.