Eanetlohku vuosttilda ahte turbiinnat gaikojuvvojit
44 proseantta 1000 olbmos vástidit ahte sii eai doarjjo Fovsen-akšonisttaid gáibádusa njeaidit bieggaturbiinnaid Fovsenis, čállá VG. Dát boahtá ovdan iskosis maid Respons analyse lea dahkan VG ovddas. 33 proseantta vástidedje ahte sii dorjot akšunisttaid gáibádusa, ja 23 proseantta vástidedje ahte eai dieđe.
NSR Nuoraid jođiheaddji Elle Nystad dadjá VG:i ahte son jáhkká bohtosa leamaš earálágan jus olmmošvuoigatvuođat livčče oassin gažaldagas.
– Dát gažaldat lea bieggafámu birra. Livččiidet sáhttit jearrat dorjot go ahte bieggaturbiinnat gaikojuvvojit «danin go dat leat olmmošvuoigatvuođarihkkun». Livčče miellagiddevaš oaidnit livččiidet go oažžut eará vástádusaid de, dadjá Nystad.