Jovsset Ante Sara oabbá, Maret Anne Sara, geigii otne lagabui 5000 vuolláičállaga departementii. Jorggu gávttiin ja čieročalmmiid son geigii lagabui 5000 vuolláičállaga, maiguin sávvá stáda bisseha bággonjuovvama Jovsset Ante Sara ealus dasságo ON lea gieđahallan ášši. Sámediggi nai geigii dan seamma gáibádusa. Otne veaigin mearridit Stuoradikkis galgágo stáda vuordit bággodoaimmaiguin dasságo ON gieđahallá Jovsset Ánte Sara -ášši.
Sámi allaskuvllas oidnet, ahte dál lea stuorra beroštupmi oahppat sámegiela.
Ollugat leat ohcan sámegiela easkkaálgi kursii, man gohčodit SÁL1 ja SÁL2.
Buohkanassii leat 70 ohcci.
– Min váttisvuohta lea, ahte mis eai leat doarvái fágaolbmot geat sáhttet oahpahit sámegiela, muitala Sámi allaskuvlla rektor Liv Inger Somby.
Son lohká allaskuvlla dál bátnegáskki bargat strategalaččat gávdnat olbmuid geat sin lusa sáhtášedje boahtit bargui ja oahpahit sámegiela easkkaálgiide.
– Jus oažžut vel ovtta dahje guokte oahpaheaddji, de sáhttit duppalastit studeantalogu. Dalle eai leat dušše 15 studeantta, muhto 30, čilge Somby.