Rapporta maid Hammarfeasta lea tingon, duođašta ahte guohtun ii báljo gávdno Fálás, ja gávpoga politihkárat leat árvališgoahtán iešguđege lágan čovdosiid.
Olgešbellodaga Håkon Rønbeck dat árvala ahte livčče vejolaš sirdit buot bohccuid Davit Sállánii.
Imašta rapportta
Boazodoallohoavdda mielas lea ártet go Hammarfeasta ii gulahala buorebut singuin, ereanoamážit go su mielas leamaš buorre ovttasbargu dan boazoáiddi oktavuođas. Hætta ii mieđit ahte son badjilgeahčča rapportta.
-Mun in gal heađis ge duššin daga rapportta, go mun in leat vel lohkan ge dan, lohká Hætta.
- Boazu buoremuš indikator
- Mu mielas lea boazu ieš dat buoremus indikator dasa makkár dilli lea. Fáláidsuolu lea nu buorre boazoeana daid min loguid ektui. Doppe leat nubbin buoremus deattut olles Oarje-Finnmárkkus, lohká Hætta.
- Guoridit boazodoalu
Hætta mielas leat máŋga beali Hammarfeastta politihkas mat čájehit ahte gávpot heađušta boazudili.
- Hammarfeasta suohkan orru válljen dakkár strategija gos dat galgá guoridit dan boazodoalu, ja dat lea mu bealis hui garra čuoččuhus.
Crossbána ja čuoigangeaidnu
Hætta čujuha earret eará dasa go Hammarfeasta lea huksehan skohteriidda crossbáná vaikke Birasgáhttendepartemeanta manai vuostá.
Dasa lassin lea maid Hammarfeasta diktán asfalterehit čuoigangeainnu olggobeallái dan boazáiddi, mii mearkkaša ahte dát maid heađušta boazodili.
