Davvi-Romsalaččat ja eará norgalaččat šaddet beali eanet máksit Finnmárkku luossajogain bivdit, go fylkka ássit. Finnmárkku Opmodat lea hábmen mávssuid, ja iige leat ságas rievdadit dáid, dadjá meahcceossodaga jođiheaddji.
Dát lea njulgestaga olggušteapmi ja berrešii rievdaduvvot, dadjá luossabivdi, Ivgumuotkilaš Martin Lyngdal
- Su mielas lea ártet, ahte sii geat orrot Norggas, fertejit máksit áibbas eará hatti Finnmárkkus, vai besset bivdit stáhta čáziin.
Ovdal ávkkástallan luonddu ovttas
Lyngdal čujuha Fremtid i Nord áviisii, ahte olbmot eará guovlluin Norggas šaddet máksit 3.500 ruvnno vahkus go áigot bivdit muhttin luossajogain Finnmárkkus. Finnmárkulaččat ges mákset beali dán supmis.
NSRa sámedikkeáirras, Rolf Johansen lea ovdal garrasit moaitán go ealgabivdojoavkkut Davvi-Romssas eai beasa searvat ealgabivdui Finnmárkkus. Son čuovvola Lyngdala, ja dadjá Davviromsalaččat leat historjjálaš rievttit háhkat luodduriggodagaid Finnmárkkus, ja nu galggašii ain leat.
- Dát lea unohis vealaheapmi, go leamaš tradišuvdnan ovttas Finnmárkulaččain ávkkástallat luonddus, guktuid bealde Fylkkarájiid, lohká Johansen.
Finnmárkku Opmodaga meahcceossodaga jođiheaddji, Einar Asbjørnsen dadjá sin leat bidjan dáid njuolggadusaid, ja sis gal ii leat jurdda dáid rievdadit:
- Jus sii ráhkadit geográfalaččat sierrarivttiid olbmuide, de dat ii doaimma. Nu ahte sii doalahit dáid rájáid, maid Finnmárkkulága vuođul leat bidjan.
GULDAL ÁŠŠI:
