Framtida til torsken har dei siste åra blitt måla med dystre fargar.
Fisken som før rann inn, har nesten ikkje kome dei siste åra.
I fjor blei mange fiskarar permitterte i Lofoten og Vesterålen. Då kom ikkje fisken før i mars.
Men i år ser det lysare ut. I alle fall for fiskar Jostein Fredriksen frå Napp i Lofoten.
Søndag fekk han nemleg historisk fangst.
– Det var heilt ekstreme tilstandar. Eg har aldri opplevd slik før. Det var heilt enormt.
Men havforskarane hoppar ikkje i vêret av gullfangsten.
– Fangstraten i fisket har gått ned dei siste åra. Det er trendar som rimar bra med det vi ser i vore forskingsrapportar. Det har vore nedgåande, seier Bjarte Bogstad.
- Det er ikkje berre i havet ein kan få gull i garnet. Fugleekspert Håvard fekk ein heilt spesiell fangst i hagen sin.
- Hadde ikkje plass i båten
Laurdag slo vekas siste storm inn over Nordland. Men Fredriksen og resten av mannskapet kom seg ut i det dårlege vêret og sette garn.
Dei fiska eigentleg etter sei. Men så oppdaga dei at det kom mykje torsk i garna. Då la dei om til torskefiske.
Da dei drog garna fann dei ein fangst dei aldri tidlegare har sett makan til.
– Det er heilt uhøyrt. Vi hadde ikkje plass i båten, seier fiskaren.
Det var Lofotposten som meldte om fangsten først.
Fiskarane på Josberg fiskar med garnlenker. Eit garn er 30 meter langt.
Etter 3 lenker, eller 75 garn, hadde dei om lag 30 tonn torsk i båten og måtte inn med fisken før dei kunne hente resten. Til slutt hadde dei landa 44 tonn på éin dag.
Og slikt blir det pengar av.
Fredriksen har nemleg aldri fått så mykje for fisken som han gjer i år. Han får om lag 40 kronar per kg sløyd fisk.
Det vil seie at han og mannskapet tente 1,7 millionar på berre ein dag.
- Det er fleire måtar å få stor fangst på. Jonas fekk ein fangst som såg ut som ein julegris.
Uvêr kan ha vore ein fordel
Charles Aas, avdelingsdirektør for omsetning ved råfisklaget, fortel at det er meldt om gode fangstar fleire stader nord i landet.
– Det ser ut til at skreien er på veg sørover. Han har allereie kome til Vest-Finnmark og Troms, seier han.
Så langt i år har 9.500 tonn skrei blitt tatt på land. Men på denne tida i fjor hadde fiskarane fiska om lag 5000 tonn meir enn i år.
– Det er litt bak fjoråret. Det er på grunn av det dårlege vêret i førre veke, fortel Aas.
I uvêrsveka blei det berre fiska 200 tonn torsk, ifølge avdelingsdirektøren. Det er veldig lite for januar månad.
Men det dårlege vêret kan òg ha vore ein fordel for fiskarane.
– Kanskje skreien har brukt uvêret til å kome litt nærmare kysten.
Fiskarane skal også fiske 25–30 prosent mindre fisk i år enn i fjor, etter råd frå forskarane.
– Difor er det ingen dramatikk at vi ligg litt bak fjoråret, seier Aas.
– Blir mindre fisk
Bjarte Bogstad, forskar i Havforskingsinstituttet, seier fangsten kan tyde på at torsken kjem tidlegare enn i fjor. Men i fjor kom torsken spesielt seint.
– Korleis henger denne storfangsten saman med nedgang i torskebestanden?
– Ein kan ikkje trekke slutningar etter berre éin observasjon. Sjølv om det blir mindre fisk, vil det alltid vere plassar der det er store konsentrasjonar, seier Bogstad.
Fiskaren i Lofoten meiner ikkje det er noka torskekrise.
– Samanlikna med fjoråret er det 5–10 gonger meir torsk i fangstane enn det var i fjor, seier Fredriksen.
Han trur det er ein annan grunn til at forskarane ikkje finn torsken på sine målingar:
Nemleg at fisken svømmer i dei øvre vasslaga.
– Vi fiskar i Barentshavet om hausten. Då opplever vi at det er masse torsk, sjølv om forskarane som kjem seinare ikkje finn noko.
Men havforskaren meiner deira berekningar er sikre nok.
– Vi observerer både med trål og ekkolodd, og prøver å dekke heile vassøyla frå topp til botn. Men det kan variere både over tid og område kor høgt fisken står, seier Bogstad.
– Det er lite usemje i næringa om at dei store linjene i utviklinga i torskebestanden er nedgåande.
– Er nedgangen dramatisk?
– Vi har vore mykje lågare enn no, men vi bør fiske såpass forsiktig at vi klarar å stoppe nedgangen, seier forskaren.
Inga tid til feiring
Det blei ikkje tid til noka feiring etter gullfangsten for fiskarane i Josberg. Skreifisket er i gang, og dei måtte rett ut og fiske igjen.
Dagen etter fekk dei om lag 15 tonn fisk. Det er meir normalt fortel Fredriksen.
– Er det slutt på hellet no?
– Det var veldig få ute og fiska nett dei dagane. Det kan vere difor vi fekk så mykje. Men eg trur det kan bli mange gode år for dei som er fiskarar no.