Vil ha fram gründerspirar ved å knyte arbeidsliv og skule tettare saman

Denne morgonen vert dei orienterte om det som skal skje. Elevane set seg ned i stolradene på kulturhuset saman med dei som skal danne gruppene seinare i veka.

Oppvekstsjefen tek ordet først. Ho har lang erfaring frå skulen og har stor tru på at dette er matnyttig både for elevane og for bedriftene. Sølvi Lillebø Remøy er trygg på at det også kan vere gründerspirar blant dei mange 14-åringane i salen. Kanskje kjem elevane tilbake til Herøy etter ferdig utdanning om nokre år. Då gjeld det å påverke tidleg.

HAV Group vil ha fleire jenter

Klara Solheim og Rikke Grimstad er blant rundt 20 elevar som vert plukka ut til å besøke verksemda HAV Group i Fosnavåg sentrum. Elevane kjem inn i lokala til bedrifta. Enkelte er nysgjerrige og stille mange spørsmål. Andre berre lyttar og ser.

HAV Group er eit internasjonalt selskap som satsar på grøn teknologi og design til den maritime industrien. Som så mange andre verksemder ønskjer dei fleire kvinner inn i bedrifta. Derfor er den konkrete oppgåva til elevane frå 9. klasse; korleis kan dei rekruttere inn fleire jenter.

Klara Solheim synest oppdraget høyrest spennande ut, men samtidig litt vanskeleg å gjennomføre. Ho trur likevel det vert bra til slutt. Rikke Grimstad meiner også det er interessant. Umiddelbart trur ho dei kjem til å velje ei videoløysing for å presentere oppgåva for HAV seinare i veka.

HR-sjef Frank-Levi Kvalsund i HAV Group har store forventningar til prosjektet. Dei bestemte seg tidleg for å vere med på dette.

–Vi gler oss veldig til å følge elevane gjennom dette prosjektet. Ungdomane kan gi oss innspel på korleis me kan rekruttere fleire jenter til verksemda.

Noko av poenget med innovasjonscampen er også å stimulere til gründerverksemd. Kvalsund seier det er tradisjon for å dyrke fram slike talent her ute i havgapet. Han ser ikkje bort frå at der er nokre framtidige gründarar blant desse 9.klassingene.

Har svært gode erfaringar

Kariann Dimmen Flovikholm er kompetansesjef i fylkeskommunen. Rett nok har dei blikket retta primært mot den vidaregåande skulen, men opplegget på ungdomsskulen i Herøy synest ho er spennande.

–Det er veldig positivt at ungdomsskulen knyter til seg lokalt arbeidsliv, både gjennom innovasjonscampar, men også gjennom samarbeidsbedrifter. Dette er noko dei vidaregåande skulane har lagt stor vekt på i mange år, og vi har eit svært godt samarbeid med lokalt og regionalt arbeidsliv.

Krevjande, men spennande

Dagen etter på skulen, Ytre Herøy ungdomsskule, er elevane samla i gruppene. Dei arbeider for fullt med oppgåva dei har fått. Praten går mellom tenåringane. Dei har alle tankar og idear om korleis dei kan gjere dette.

Klara Solheim fortel at dei er litt etter skjema. Ho synest det har vore både kjekt og stressande fordi dei har eit tidspress på seg. Ho trur likevel det vert bra til slutt,

I eit anna klasserom sit Rikke Grimstad saman med tre andre elevar. Ho seier dette er ei fin avveksling frå ordinære skule. At dei lærer mykje når dei får arbeide på denne måten.

Les også Studenter kaster mest mat: 65 prosent av maten regnes som spiselig

Lærer på litt annan måte

Rådgjevar Elisa Hareide var blant dei som kom med ideen til innovasjonscampen.

Ho håper elevane gjennom dette vert betre kjende med alle dei fine moglegheitene som finst i Herøy.

–Eg håper elevane lærer på ein litt annan måte enn dei gjer i skulekvardagen. Elevane synest det er kjekt med ei litt annleis skuleveke der dei har fridom til å løyse oppdraget på sin måte. Samtidig står dei fritt til korleis dei vil presentere resultatet. Så dette er bra!