Ingen slepp inn i rådhuset på Vestnes utan å ha gjort avtale på førehand. Slik har det vore sidan fleire tilsette blei utsett for alvorlege truslar og sjikane frå ein person.
– Eg veit om tilsette som ikkje tør å gå på butikken etter jobb eller ta ferja over fjorden. Det er vanskeleg å opne opp att her og la alle gå fritt, seier ordførar Randi Bergundhaugen (H).
Ho vil at innbyggjarane skal forstå at det ikkje berre er i Oslo og store byar at kommunetilsette står ovanfor trusselsituasjonar.
Framand mann på kontoret
Rådhuset i Vestnes blei tatt i bruk i 1986 og når du først har kome innfor dørene kan du gå rundt i heile bygget. Bergundhaugen har opplevd at ein vilt framand mann plutseleg stod inne på ordførarkontoret.
– Det går jo stort sett bra det, men det hadde jo ikkje trengt å gjere det, seier ordføraren.
Ho veit også at folk har gøymt seg inne i det kronglete bygget etter stengetid.
Kva med å leige inn vektarar?
– Det kunne vi sikkert, men det er også snakk om økonomi og ei heilskapsvurdering, seier Bergundhaugen. Å innføre timebestilling blei sett på som enklare.
No blir ikkje dørene opna igjen før inngangspartiet er bygd om. Då skal glasveggar gjere at dei tilsette slepp å vere i fysisk kontakt med besøkande.
Høgare terskel
Fleire av innbyggjarane i Vestnes likar dårleg dei stengde dørene. 93 år gamle Per Tomren vil helst hatt det slik som før då det berre var å møte opp.
– Det er dumt. Rådhuset burde ha vore tilgjengeleg for oss som bur her, seier Tomren.
Siw Stavik forstår godt kvifor dørene er stengt, men det gjer det vanskelegare for innbyggjarane.
– Du må jo ringe og bestille time for det meste. Du kjenner at terskelen for å ta kontakt med dei er litt høgare, seier Stavik.
Fleire har stengde dører
Vestnes er ikkje åleine i landet om å ha stengde dører, sjølv om det ikkje nødvendigvis er truslar som er årsaka til alle stengingane, seier spesialrådgivar Torill Neset i Kommunesektorens organisasjon, KS.
Ho meiner likevel innbyggjarane får hjelpa dei skal ha.
– Det er viktig at kommunehus og rådhus er tilgjengelege, men eg tenker at det er ganske vanleg i samfunnet å gjere avtalar på førhand for å ta opp saker ein vil snakke om, seier Neset.
Fleire sjuke
Personen som kom med truslar i Vestnes i haust fekk besøksforbod fram til november.
– Besøksforbodet er opphøyrt og det er ingen politisak no, opplyser politioverbetjent Vebjørn Bale.
Ordføraren i Vestnes trur kommunane må tenke meir tryggleik framover, sidan psykisk sjuke i større grad enn før blir overlatne til dei.
– Folk blir utskrivne frå sjukehus før dei er friske. Det er mange utfordringar som gjer at situasjonen blir tøffare ute i landets kommunar. Vi må rigge oss deretter, seier Bergundhaugen.
Ho er usikker på kor tid rådhuset kan opne igjen og kor dyrt det blir.
– Eg håper at folk då kan føle seg trygge på jobb, seier Bergundhaugen.