Dagens ungjenter manglar ikkje bilde av seg sjølv og venene sine. Mange er lynraske med å fotografere og publisere på nett og via mobilar. Men no er det dei summande, sakte-gåande polaroidkamera mange vil ha.
- Les også:
– Eg syns det er veldig gøy å ha bildet fysisk i handa, i staden for dei ditigale bileta. Det er koselegare å sjå på, seier Frid-Elin Sandmo Johansen (16) frå Ellingsøya utanfor Ålesund.
Hylande ungjenter i butikken
Fotobutikken Sponland i Ålesund er ein av dei som har merka etterspurnaden. Over heile landet har butikkar vore utselde for polaroidkamera, eller Instax-kamera, ein annan variant.
– For første gong har vi hatt jenter på 14-15 år som kjem hylskrikande inn i butikken og ropar "hurra, de har det vi vil ha!" seier dagleg leiar Marit Brunstad.
I vinter har dei ifølgje henne selt rundt 100 kamera.
– Det er veldig sjeldan for eitt merke. Og vi kunne selt endå meir, men det er skrapa tomt i heile Europa, seier ho.
Snart 70 år gamalt
21. februar 1947 demonstrerte Edwin Land verdas første polaroidkamera. Også her i landet blei kamera populære, men forsvann nesten på 90-talet, då dei digitale kamera tok over. Dei blei lenge haldne for å vere treige, dyre i drift og gje dårleg kvalitet. Men no har dette snudd.
Les også:
– Aldri tatt i eit bilde før
Det går rett nok nokre minutt frå bildet er tatt, og fotoet brummande blir spytta ut, til motivet er klart. Men Brunstad trur nettopp dette er noko av sjarmen for dei unge jentene.
– Dersom du er 14 år har du kanskje aldri halde eit bilete av deg sjølv i handa, det trur eg er greia, seier ho.
Høgt på ønskjelista
16-åringen Frid-Elin Sandmo Johansen fekk det gule kameraet sitt i julegåve frå mora, og det sto høgt på ønskjelista.
– Eg har alltid ønskt meg eit slikt. Vi har bilde på mobil, data og overalt, det blir så kjedeleg. Det er mykje gøyare å lage eit album eller henge bileta rett på veggen, der du kan sjå på dei, seier ho.