Fleire hundre meter inn i den nedlagde Runehamartunnelen ved Innfjorden i Rauma kryr det av brannmannskap med hjelmar og sløkkeutstyr. Ein personbil står i brann og då trengst det røykdykkarar.
Få har opplevd tunnelbrann
-Det er svært få brannfolk som har opplevd ein reell tunnelbrann, og difor er dette viktig erfaring, seier Idar Eidem i Molde brannvesen.
I to dagar har det vore seminar om tunneltryggleik i Rauma. Seminaret er eit samarbeid mellom Statens vegvesen og Molde brannvesen. I tillegg til brannmannskap, deltek også politi og folk frå Statens Vegvesen frå alle delar av landet.
Berre tre testtunnelar i Europa
Dei praktiske øvingane føregår i den nedlagde Runehamartunnelen ved Veblungsnes i Rauma. Sidan 2003 har den 1,6 km lange tunnelen vore brukt som testtunnel og er ein av tre i Europa som er eigna til slik brannforsking.
- Vi er ein stor tunnelaktør, og treng å få prøve ut materiale og løysingar gjennom slike forsøk, seier Harald Buvik. Han er senioringeniør ved Vegdirektoratet i Molde, og var den som tok initiativet til å ta den gamle tunnelen i bruk.
Tryggare tunnelar
- Takka vere slike omfattande branntestar har norske tunnelar vorte tryggare, meiner Buvik. Det meiner også overbrannmeister Eidem.
-Slike øvingar bidrar til at brannmannskap får ei aha-oppleving. Vi skal ha respekt for tunnelbrann, men det treng ikkje alltid vere så ille som vi trur, seier Eidem,
Ikkje kurs berre for leiinga
Seminaret er ikkje eit kurs berre for sjefar, men for dei som skal ut og gjere jobben. Ole Christian Torgalsbøen i Statens vegvesen
seier at tidlegare var det berre politi og brannfolk på leiarnivå som vart kursa.
-Det er ikkje brannsjefen som skal inn i tunnelen og drive sløkkingsarbeid. No skal brannmannskapet få kunnskap og kompetansen dei treng, seier Torgalsbøen i Statens vegvesen