Sandnes lar seg ikkje skremme av at fylkesrådmann Ottar Brage Guttelvik rår fylkestinget til å utsetje bygginga av Nordøyvegen på ubestemt tid.
– Eg trur det politiske fleirtalet i fylkestinget om å byggje Nordøyvegen står fast, seier Sandnes.
Politisk semje
Det var tidlegare i dag det blei kjent at fylkesrådmannen vil rå fylkestinget til å utsetje bygginga av vegsambandet som vil koste vel 3 milliardar kroner. Årsaka er at gjelda til fylkeskommunen nærmar seg ni milliardar kroner. Sunnmørsposten skriv at Guttelvik vil be fylkestinget vedta investeringsstopp for alle nye prosjekt.
– I forhold til det som skal fram i Fylkestinget, kan eg ikkje sjå det blir noko utsetjing. Det har jo vore politisk semje om bygging av vegen, og det har det vore i lang tid. Så dette går sin gang, seier Sandnes til NRK.
Ingen dramatikk
Haramordføraren forstår at folk kan bli uroa av oppslaga i media om utsetting av sambandet.
– Men eg trur ikkje det ligg noko stor dramatikk i dette, seier han.
– Men den økonomiske situasjonen har forverra seg?
– Ja, men ikkje sidan saksdokumenta til fylkestinget blei sendt ut. Så eg kan ikkje skjøne at der har kome noko nytt i saka, seier Sandnes.
Ordføraren viser også til at ferjeavløysingsmidlane har betra vilkåra for prosjektet. Dette er midlar som staten ville ha brukt til å drive eit ferjesamband, og som i staden blir brukte til å bygge brua, tunnelen eller vegen som erstattar ferjene. Regjeringa gjekk i mai inn for at ordninga med ferjeavløysingamidlar kan gjelde i 40 år, og med ein sum på 15 millionar kroner per ferje.
Ferjefritt
– Ferjeavløysingsmidlar saman med den historisk lave renta, gjer at alt går i positiv lei for Nordøyvegen og også andre prosjekt, meiner Bjørn Sandnes.
Nordøyvegen vil gi fastlandssamband til rundt 2900 innbyggarar i Haram og Sandøy kommunar. Planane om å knyte saman øyane blei lasert på 1980-talet. Prosjektet omfattar tre fjordkryssingar, bruer og tunnelar.