- Det var like før vi gav opp

Det har vore mange hindringar på vegen før arbeidet kom i gong i dag. Tunnelen og bygging av bru over Tresfjorden skal gjere hovudvegen mellom Møre og Romsdal og Austlandet kortare og tryggare, men prosjektet vart utsett fordi det vart dyrare enn først rekna ut. I tillegg har diskusjonen om bompengar tatt tid.

– Det er ein gledas dag. Det var like før vi gav opp, seier Nils Valde, i selskapet Eksportvegen AS som har dreve fram prosjektet.

Arbeidd i 24 år

Dei har arbeidd med prosjektet i to tiår, og har hatt mange besøk av stortingsrepresentar som har rosa planane. Valde fortel om dei mange skuffelsane då politikarane drog heim til Oslo og syntest å ha gløymt heile greia.

– Hadde det ikkje vore for ei einskild setning som kom med i Nasjonal Transportplan, der det stod at prosjektet skulle vurderast ved neste rullering, hadde vi lagt alt på is, seier Valde. Han har stått på for bru over Tresfjorden sidan november 1988.

Miste livet

Også Stortingsrepresentant Jenny Klinge har lagt ned mykje arbeid i prosjektet. Ho håper at tryggleiken for trafikantane skal bli mykje betre.

– Det er mange som har mist livet her, men eg trur også at mange vil berge livet når vegen står ferdig, seier Klinge. Ho skryt av innsatsen frå dei lokale pådrivarane.

Kortare veg

Vågstrandtunnelen i Rauma kommune er 3,6 kilometer lang og vil redusere faren for skred. Tresfjordbrua som skal stå ferdig i 2015 vil gjere at E136 vert 14 kilometer kortare. Prislappen for dei to utbyggingane er rekna til 1250 millionar kroner, og vert delvis finansiert gjennom bompengar.