Volda skulekorps er eitt av korpsa som slit med rekrutteringa. I år må dei slå seg saman med Volda hornmusikk for å klare å stille korps 17. mai.
- Korps er ein aktivitet som er veldig kjekt for ungane å drive med. Dette er ein arena der vi ikkje fokuserer på å konkurrere. Dei har moglegheit til å lære seg eit instrument som dei kan ha glede av resten av livet, seier leiar Benedikte Holmberg.
Dei siste ti åra har talet på korpsmedlemar i Noreg under ti år gått tilbake med omlag ti prosent.
Håper "Orps" vil redde rekrutteringa
Det var mange som såg på NRK-serien "Orps", om det å spele i korps, som gjekk på NRK Super i fjor.
Kommunikasjonssjef Stig Rydland i Norges Musikkkorps Forbund seier dei opplevde stor interesse etter serien, og at dei brukte 150 000 kroner på marknadsføringstiltak i etterkant av det.
- Rapportar vi får frå korps over heile landet er at dei opplever stor pågang blant små barn som tykkjer korps ser gøy ut og kjekt å halde på med, fortel Rydland.
Vil ha foreldra på banen
Også Volda skulekorps trur på nye tider. Benedikte Holmberg håper at eit betre samarbeid med kommunen skal gje resultat.
- Vi har hatt samtalar med både kommunen og kulturskulen og vi har fått berre positive tilbakemeldingar. Så eg trur kommunen ser alvoret i det og ser at vi må lyfte i lag for å få til dette.
- Motiver borna
Holmberg ynskjer også at foreldra skal motivere borna sine til å vere med i korpset.
- Dersom foreldra vert meir positive og ser at dette er ein kjekk plass for ungane å tilbringe litt av fritida si på, så vert dette bra!