Når sydsida av Ålesund skal byggjast ut, kan det bli etter teikningane frå eit dansk arkitektfirma.
-Om fire år vil spada vere i jorda, og om ti år er delar av området bygt ut, trur ordførar Bjørn Tømmerdal.
Danskane ser blant anna for seg å bygge ei eiga kulturhamn med bustader, terasser, musikkhus, flytande scene og galleri sør for dagens rutebilstasjon. Dei planlegg også å skape nye sund og viker. Sjå vinnarforslaget her.
Har ikkje trua
– Eg håper planane er realistiske, men eg trur ingenting, seier varaordførar Geir Stenseth (Frp). Danskane har også foreslått firefelts motorveg over Hellebroa, men det ler politikarane av.
-Forslaget ser flott ut, men det blir nok ikkje fullt bygt ut i mine levedagar, seier Stenset.
Underskriftskampanje
Det var underskriftskampanjar og stort oppstyr for to år sidan fordi Ålesund kommune ville regulere sydsida av byen, utan å lyse ut arkitektkonkurranse.
Bystyret snudde i saka og laga ein idékonkurranse, der det kom inn 30 forslag. I går vart det klart at det var det danske arkitektfirmaet JAJA Architects som gjekk av med sigeren.
Les også:
Private skal betale
Og det er slett ikkje slik at Ålesund kommune skal betale prislappen. Det er det private utbyggjarar som skal gjere.
– Kommunen eig kaiområde og vi vil legge til rette for dei som er interessert, seier Tømmerdal.
Altfor optimistisk
Selskapet Keiser Willhelmskvartalet har vore interessert i området og var i si tid ein pådrivar for å få sydsida av Ålesund regulert. Dei såg for seg å bygge kontor og næringsareal i området.
– Fire år til utbygging er altfor optimistisk. I Ålesund tar planleggingsarbeid mykje lengre tid, seier Albert Krohn-Dale Aarøe. Han er dagleg leiar i Keiser Willhelmskvartalet, og meiner at det å få på plass gode vegløysingar vil vere tidkrevjande.
Vil ikkje betale
Han synest fleire av dei innkomne forslaga er spanande, men er usikker på om dei er i samsvar med det byen har behov for.
-Kulturkvartal er spenstig, men kven skal betale for moroa? spør Aarøe. Han har aldri hatt planar om å bygge konserthus.
Kloke val
Ørnulf Opdahl er styreleiar i Stiftinga Kjell Holm, som har engasjert seg sterkt for utbygginga av Ålesund. Han er svært optimistisk og meiner at det er realistisk å starte bygginga allereie om fire år.
– Alt kviler på politikarane no. Det er dei som må gjere kloke val. Det er eit gigantisk ansvar dei har, men eg håper dei er sitt ansvar bevisst, seier Opdahl.
Vegen vidare
Idévinnarane skal no samarbeide med planavdelinga til Ålesund kommune for å utvikle ein områdeplan. I fylgje ordføraren kan dette arbeidet ta rundt eit år, og planen skal så vidare til politisk behandling. Kommunen sitt eigedomsselskap må også ut og finne interessentar, gjennom ein salskonkurranse.
– Styrken til vinnarutkastet er at det kan byggjast trinnvis, seier ordførar Bjørn Tømmerdal.