Slik blir sjukehusa i Ålesund og Volda forma

Den bygningsmessige utviklingsplanen handlar om alle institusjonane til Helse Møre og Romsdal, med unnatak av det nye fellessjukehuset for Nordmøre og Romsdal som skal byggast på Hjelset. Og i første omgang er det sjukehusa i Volda og Ålesund som står i fokus. Dei mindre institusjonane skal gjennomgåast seinare.

• Her er utkast til skisser for utviklinga av Ålesund sjukehus

Helse Møre og Romsdal har hatt store økonomiske utfordringar og raude tal i fleire år. Med mange store prosjekt på planane i dei komande åra, blir det store spørsmålet: Har ein økonomi til å gjennomføre planane for sjukehusa i Ålesund og Volda? Ja, meiner Helge Ristesund, assisterande direktør i Helse Møre og Romsdal.

– Dette må vi finne råd til. I tillegg må vi vise gjennom god økonomisk drift at vi har pengane.

– No har vi tatt oss råd til å bygge det nye fellessjukehuset på Hjelset, noko som både var rett og viktig. Men vi må også ha vilje og evne til å få til utvikling på Sunnmøre. Difor har vi også lagt inn rammer i langtidsbudsjettet for å utvikle sjukehusa i Volda og Ålesund, seier Ristesund.

• Les også: Må spare 200 millionar i 2018

– Viktig å bli involvert

Utviklinga av helsetilbodet til folk i Møre og Romsdal skal styrast etter to hovudplanar. Den eine planen gjeld kva helsetilbod som skal ytast ved dei forskjellige institusjonane. Den andre planen handlar om korleis bygningane til Helse Møre og Romsdal skal utformast.

Deler av innhaldet i den bygningsmessige utviklingsplanen blei kjend delvis gjennom media i oktober 2017. Den gongen kom det fram sterke reaksjonar blant dei tilsette som klaga på manglande involvering.

Arbeidet med planen blei sett på vent og det blei organisert nye møteseriar der dei tilsette skulle få høve til å kome med meiningane sine. Det er denne møteserien som no er i full gang. Ingeborg Henriksen, varahovudtillitsvalt i Yngre Legers Forening, er nøgd med at dei no har blitt involvert i arbeidet.

– Eg synest at helseføretaket har lagt opp til ei brei og god involvering av både fagfolk, tillitsvalde og andre helsepersonell. Denne involveringa har vore med på å gi oss tiltru til prosessen, seier ho.

Satsar både i Ålesund og Volda

Henriksen vektlegg at det er nokre område som hastar meir enn andre.

– Eit nytt akuttmottak, ei ny intensiv og eit nytt isolat er tre viktige satsingsområde. Men vi veit også at dette er ein utfordrande prosess som kjem til å ta tid, og så må vi også godta at det tek tid slik at det blir best mogleg, seier ho.

Totalt er det tenkt fem ulike scenario for Ålesund og tre for Volda. Både Henriksen og Ristesund innrømmer at det er nokre alternativ som peiker seg meir ut enn andre.

– Dei som jobbar ute blant pasientane tilrår ei klar retning, både i Volda og Ålesund. I Ålesund peikar det mot ei utvikling som går i fleire trinn med fleire utbyggingar. I Volda er det derimot ei større og omfattande ombygging som blir tilrådd, seier han.

Ristesund meiner at utviklingsplanane for dei to sjukehusa viser ei offensiv satsing frå helseføretaket.

– Det vi legg fram no viser at leiinga har klare ambisjonar for begge desse sjukehusa, seier han.

Bygningsmessig utviklingsplan for sjukehuset i Ålesund

Utviklinga av Ålesund sjukehus er tenkt ut frå 5 ulike scenario. Det første scenarioet er ei avgrensa utbygging med nybygg mot nord og vest, der sengepostar og operasjonsstover blir liggande som i dag.

I det andre scenarioet blir det også to nybygg, der det blir sengepostar og der det blir teke i bruk nye areal for operasjonsstover og fødeavdeling.

Scenario 3 er ei meir omfattande utbygging, der det i tillegg til nybygg mot nord og vest også blir bygt nytt mot aust. I dette alternativet blir det både sengepostar og operasjonsstover i nybygga.

I Scenario 4 skal det byggast både mot aust og vest, med operasjonsstover i nybygg og med sengepostar i ei ombygd eksisterande lågblokk.

I det femte alternativet blir det berre bygt mot nord. Bygget skal i så fall innehalde ny hovudinngang med kantine, laboratorier og sengepostar. Dette skal frigjere areal i lågblokk og høgblokk til forskjellige funksjonar.

• Her er utkast til skisser for utviklinga av sjukehuset i Volda

Bygningsmessig utviklingsplan for sjukehuset i Volda

Utviklinga for Volda sjukehus er tenkt ut frå 3 ulike scenario. I det første scenariet skal det byggjast to tilbygg som betrar tilhøva blant anna på akuttmottaket og poliklinikk.

I det andre scenarioet skal det byggast eit nytt behandlingsbygg over parkeringsplassen på nordsida av det eksisterande bygget.

Og i det tredje skal det byggast eit nytt sengebygg på same stad, eit bygg som vil frigjere areal i det eksisterande bygget.

Planane blir lagde fram for styret i Helse Møre og Romsdal 21. februar. Der skal utviklingsretninga peikast ut. Deretter skal det lagast plan for finansiering og gjennomføring.