Torsdag vann Molde FK enkelt over polske Legia Warszawa på bortebane i serieligaen.
No held europaeventyret fram for moldensarane. Neste motstandar blir belgiske Club Brügge. Det er klart etter dagens trekning av åttandedelsfinalane i serieligaen.
– Det er eit veldig godt lag. Alle laga som er igjen no er gode, så det var litt hipp som happ kven vi skulle møte. Men det blir spennande, seier Molde-spelar Fredrik Gulbrandsen.
Fire mål på to kampar
Spissen stod for to av dei tre måla i torsdagens kamp. Dermed står han med fire mål på dei to kampane mot Legia Warszawa.
– Det følast sjølvsagt bra. Eg får prøve å halde fram trenden, men det er jo mange mål på to kampar, seier Gulbrandsen.
Han er fornøgd med korleis laget presterte på bortebane i går. Gulbrandsen håper dei kan halde fram med den positive trenden når dei no skal kjempe om ein plass i kvartfinalane i serieligaen.
– Vi har ein fin flyt i laget no med sjølvtillit. Vi skal gå inn i kampane og ha trua på det vi driv på med, og halde fram frå der vi slapp i går. Så får vi gjere alt vi kan for å slå dei og ta oss vidare.
– Sjølv om vi veit at det kjem til å bli tøft, så er eg sikker på at det er ei moglegheit, legg han til.
I haust vann Brugge begge kampane mot Bodø/Glimt i gruppespelet.
– Hente ut det beste
Den første kampen mot det belgiske laget blir i Molde 7. mars, medan returen blir i Belgia éi veke seinare.
– Det blir to tøffe og tette oppgjer, men det er kanskje det laget vi kjenner best til, seier Molde-trenar Erling Moe.
Norske Ronny Deila er nemleg trenar for Club Brügge som også har Antonio Nusa og Hugo Vetlesen på laget.
– Det gjer det litt ekstra spennande når vi kjenner folk litt frå før. Men det blir to kampar der vi går inn med eitt mål for auget, å sette det saman på ein måte som gjer at vi får det beste ut av oss sjølv, seier Moe.
Trenaren håper oppkøyringa inn mot neste kamp blir god.
– Vi har vore veldig heldige med vinteren så langt. Vi har vore vekke når det har vore dårleg vêr heime og heime når det har vore bra. Så vi håper at vi får gode og fine forhold her heime framover.