Dawid Zwirecki blei overraska då han på sosiale medium oppdaga at polske gjestar har fått melding frå Kviltorp camping i Molde om at dei ikkje kan overnatte der.
– At dei ikkje kan sjå fotballkampen bør ikkje påverke dei som vil bestille overnatting i Molde. Visst nokon vil køyre til Molde er det deira avgjerd, seier Zwirecki.
Han er frå Polen, men har blitt norsk statsborgar etter 12 år i landet.
Kamp utan bortesupportarar
Torsdag 15. febuar skal Legia Warszawa møte Molde på heimebane. Kampen blir spelt utan bortesupportarar.
UEFA har nemleg bestemt at det polske laget ikkje får ha bortesupportarar i fem kampar i Europaligaen på grunn av valdelege opptøyar før ein Aston Villa-kamp.
Både politifolk og supportarar blei skadde i opptøyane.
Legia Warszawa sine tilhengarar er berykta for å lage trøbbel. Då laget besøkte Molde for over ti år sidan, var også spenninga høg.
- Etter ein serieligakamp i Nederland i haust vart også to Legia Warszawa-spelarar henta på spelarbussen og arrestert.
– Det kom skeivt ut
Christian Nakken jobbar ved Kviltorp camping og seier det heile var ei misforståing.
– Det var ei uheldig melding til nokre polske gjestar. Det kom skeivt ut, seier Nakken.
Han understrekar at polske gjestar utgjer ei stor kundegruppe i løpet av året og at dei har berre lovord om både dei som kjem som turistar og dei som kjem for å jobbe.
Campinga har vore i kontakt med politiet som har åtvara dei mot at det kan kome polske supportarar, som er utestengt frå kampen.
– Alle polske gjestar er velkomne. Vi har ingen grunn til å nekte dei besøk, seier Nakken.
- Det skjer ofte at tilhengarar vert utestengde frå kampar, men svært få har fått so lange «soningar» som denne mannen frå Nederland.
Har tatt grep
Hans Kristian lundgren i Møre og Romsdal politidistrikt seier at dei ikkje har sett nokon grenser for overnattingsplassane i samband med kampen. Sjølv om polske supportarar er utestengt frå kampen, har politiet budd seg på at dei kan dukke opp likevel.
Kva grep dei har tatt, vil han ikkje ut med.
– Det vanskelege er at UEFA seier jo ikkje nei til polske som heier på Molde, men dei seier nei til dei som heiar på Legia. Så kven er kven? seier Lundgren.
Molde-tilhengar Zwirecki trur likevel nokre Legia Warszawa-supportarar kjem til å prøve å komme seg inn på kampen. Sjølv er han uansett ikkje i tvil om kva skjerf han kjem til å ha om halsen.
– Eg heiar sjølvsagt på Molde.