– Det har vore både brød og sirkus, seier han.
Bakgrunnen for det heile er to av klubbens medlemar, som ikkje har fått opphald i Noreg. Dermed vart familien sendt til Kviterussland, fordi dei ikkje kunne returnere til heimlandet Tsjetsjenia.
– Hadde ikkje drøymt om så mange
– Pengane me får inn er øyremerkte til ei stilling for han i klubben, seier Løvik, som fortel at søknaden ligg inne hjå Utlendingsdirektoratet for å få 16-åringen tilbake til Noreg.
Økonomisk kan det vise seg å bli ein suksess. Allereie før dørene opna til loppemarknaden laurdag morgon, stod det nemleg mellom 150 og 200 personar i kø for å kome inn i marknadshallen.
– Me er offensive, men me hadde ikkje drøymt om at det skulle vere så mykje folk som dette, seier Løvik.
Arrangementet går over to dagar. Laurdag var om lag 50 personar i sving, med sal av lopper, mat og drikke, og henting av ting som må til for å få arrangementet til å gå rundt.
Sju veker sidan ideen dukka opp
Ein av samarbeidspartnarane til klubben auksjonerte laurdag vekk fem bruktbilar. Søndag held dei fram marknaden, mellom anna med auksjon av dei to siste bilane, og mange tusen lopper tilgjengeleg.
– Ideen er sju veker gamal, fortel Løvik.
Då vart det stilt spørsmål i klubben, om ikkje ein kunne få til ein loppemarknad for å få 16-åringen tilbake til Kristiansund. Sidan det har det gått i eitt.
– Enkelte personar har brukt kvar dag i fleire veker. Dei har teke fri frå jobb, det har vore enormt mykje arbeid, fortel Løvik.
Humanitær hjelp
Lopper har vore henta i fleire kommunar på Nordmøre, og då marknaden opna, var det folk innom frå heile fylket, meinte arrangøren.
– Enkelte seier at dei synst me gjer ein veldig god jobb for ein familie i stor naud. Dette er reint humanitær hjelp opp mot ein familie som treng det, seier Løvik.
Det er fyrste gong klubben arrangerer noko slikt, men det ligg an til å ikkje bli den siste. Med fullt hus fyrste timane laurdag, var Løvik allereie klar på at dei må gjenta loppemarknaden.
– Dette må bli ein tradisjon, det har me bestemt.