Jenta er av utanlandsk opphav, og skal ha gått rundt åleine. Operasjonsleiar Øyvind Sund i Nordmøre og Romsdal politidistrikt fortel at ho var forvirra, og ikkje kledd for å vere utandørs, men elles i god form.
Om lag to timar etter at politiet melde om hendinga fekk dei inn tips om kven foreldra kunne vere. Før politiet rakk å ta kontakt med dei ringde dei sjølve.
– Dei kjem og hentar jenta snart, fortel Sund til NRK.
Politiet kan ikkje opplyse kvifor jenta var ute heilt åleine så langt.
– Guffent
Ho blei funnen av ei dame som var på tur i området. Kvinna fortel at jenta sprang etter ein katt rundt campingplassen.
– Vi sleit litt med å kommunisere med jenta, og ho klarte ikkje å vise oss kor ho budde, seier kvinna til NRK, som syns det var guffent å finne den vesle jenta heilt åleine.
Ingen i nærleiken av campingplassen kjente til jenta. Politiet opplyser at familien til jenta bur i området.
Det er usikkert korleis saka vil utvikle seg, men politiet er i dialog med barnevernet om kva som blir gjort vidare.