Noreg er verdas nest største eksport av sjømat og Europas største fiskeri- og oppdrettsnasjon. På Fiskerimessa i Trondheim er det i år rekorddeltaking med heile 550 utstillarar.Nedgangen i offshorenæringa har fått motsett effekt for fiskerinæringa, som rekrutterer som aldri før.
– Vi har fått på plass ei lønnsomheit i næringa som er meir i tråd enn det andre næringar kan bu på, seier leiar i Noregs fiskerilag, Kjell Ingebrigtsen.
Les også:
Fleire av dei som jobbar i olja har hatt sin bakgrunn i fiskerinæringa. Ingebrigtsen fortel at desse no vil tilbake til fiskerinæringa, då dei kjenner større sikkerheit med tanke på eigen situasjon og framtidige moglegheiter.
– Vi er ei unik næring som haustar av fornybare ressursar. Dersom vi nyttar ressursane på ein god og riktig måte, så er dette eit hjul som vil gå evig, meiner leiaren i fiskarlaget.
Godt år for rekruttering
Prosjektet "Sett sjøbein", som skal rekruttere ungdom til næringa, har slått godt an.
– Rekruttering er utruleg viktig for å halde oppe arbeidsplassar og vidareutvikle næringa. Vi har fått mange løysningsorienterte ungdom som ser moglegheiter i havet, og det lovar godt for framtida, seier Ingebrigtsen.
Talentspeidar, Kirsti Kalseth Sjøhaug er ei av dei som jobbar med å rekruttere nye ansikt under Fiskerimessa.
– Som talentspeidar er vi bestandig på jakt etter kloke hovud. Det er alltid behov for rekruttering, meiner Sjøhaug.
– Med store kutt i oljenæringa, så er det kanskje eit godt år for rekruttering?
– Ja det er det, og vi jobbar med å finne ut korleis arbeidskompetansen og erfaringane frå tidlegare oljearbeidarar kan nyttast i ein ny bransje.
Fleire kvinner i fiskerinæringa
I tillegg til å vere talentspeidar, er Kalseth Sjøhaug tilknytt "havfruenettverket", eit nettverk for kvinner som jobbar i fiskeribransjen.
– Dette er ein arena der vi kvinner kan treffast for å utveksle idear og erfaringar, støtte kvarandre og gjere seg kjende med kven som jobbar i næringa, forklarar ho.
Havfruenettverket vart oppretta for 15 år sidan då fiskerinæringa enda var ein svært mannsdominert bransje.
– Dette har endra seg og vi har mange flotte damer innanfor fiske i både store og små stillingar. Likevel er det godt å ha ein eigen arena der vi kan treffast, seier Sjøhaug.