48 skular i Møre og Romsdal har sidan i fjor haust konkurrerte om å vere dei to laga som går vidare til landsfinalane i Oslo. Dette er ny rekord.
I dag blei det klart at desse to skulane er: Spjelkavik ungdomsskole i Ålesund og Kolvikbakken ungdomsskole i Ålesund.
Dette er andre året på rad at Spjelkavik ungdomsskule går vidare til landsfinalane.
– Ja, no må vi sjå om vi kan halde fram den tradisjonen. Det er veldig kult å ha gått vidare, no skal vi gjere oss klare for å reise til Oslo. Det gler vi oss til, seier Svein Harald Ruud Schmidt.
Ved Kolvikbakken ungdomsskole blei det også full jubel då det blei klart at dei var eitt av dei to vinnarlaga. Ulrik Refsnes Lerstad har tidlegare lovd at han skulle leite fram dressen om dei kom til landsfinalane.
– Ja, eg skal halde det eg har lovd. No er det berre å leite den fram, seier han lattermild.
I tillegg til å bli kåra til fylkesvinnarane i Møre og Romsdal får dei to laga 5.000 kroner kvar, som går til heile klassa.
Fire skular kjempa om siger
Dei fire skulane som konkurrerte i fylkesfinalen av Klassequizen var: Spjelkavik ungdomsskole i Ålesund, Atlanten ungdomsskole i Kristiansund, Vågsetra barne- og ungdomsskole på Skåla i Molde kommune og Kolvikbakken ungdomsskole i Ålesund.
Alle dei fire skulane fekk 12 spørsmål som dei måtte svare på. Her kan du høyre spørsmåla dei fekk:
Spjelkavik ungdomsskole stilte med elevane Svein Harald Ruud Schmidt, Theodor Andre Nerås og Oda Overvoll Kjersem. Dei fekk totalt 10 poeng.
Frå Atlanten ungdomsskole i Kristiansund var det elevane Iver Naalsund, Ida Fjerstad og Erik Andreas Falkhytten Leikvoll som deltok. Dei enda på 5 poeng.
Vågsetra barne- og ungdomsskole var representert med elevane Frida Børstad, Tyra Helene Risan Bergem og Edvard Malvin Heen Nakken. Dei fekk 6 av 12 rette.
Kolvikbakken ungdomsskole sitt lag bestod av Thea Fuglseth, Ulrik Refsnes Lerstad og Myrtel Magrittsdotter Melsæter. Dei fekk til slutt 8 poeng.
Her kan du sjå bilde av alle laga:
Vidare til landsfinalane
Spjelkavik og Kolvikbakken blir no to av totalt 36 skular som skal konkurrere i dei nasjonale finalerundane som startar i april. Desse blir sendt på NRK 1 med Selda Ekiz som programleiar.
Fleire enn 600 skular rundt omkring i landet har meldt seg på Klassequizen i år.
I finalerundane på TV er konkurranseforma i stor grad den same som i dei lokale sendingane. Vinnarane av heile Klassequizen får Klassequizen-trofeet, og blir feira med eit heidundrande show på radiokanalen NRK Mp3 med fleire artistar.
Slik gjekk det med alle skulane
I denne sesongen av Klassequizen er det Øyvind Berge Sæbjørnsen som har reist rundt i fylket og testa elevane.
Frå midten av oktober og fram til desember har Klassequizen gått på NRK P1 Møre og Romsdal kvar dag frå klokka 14.30.
Slik gjekk det med skulane i dei innleiande rundane.
Her kan du høyre korleis det har gått med alle skulane i dei innleiande rundane av Klassequizen:
Slik går Klassequizen føre seg
Kvart lag har tre elevar, og ein reserve. Programmet blir sendt på radio, og der får deltakarane fire kategoriar, med tre spørsmål i kvar kategori. Det er mogleg å få totalt 12 poeng.
I fjor var det Helland ungdomsskule og Spjelkavik ungdomsskole som blei fylkesvinnarane av Klassequizen.