Desse er vidare til fylkesfinalen i Klassequizen

Etter ein spennande haust er det no klart kva fire skular som er vidare til fylkesfinalen i Møre og Romsdal.

Møre barne- og ungdomsskule, Frei ungdomsskole, Bergmo ungdomsskole og Kolvikbakken ungdomsskole har alle fått 11 poeng i dei innleiande rundane.

Fylkesfinalen blir arrangert 11. januar neste år. Dei to beste laga derifrå får så reise til Oslo for å konkurrere i landsfinalen.

Desse elevane konkurrerer i fylkesfinalen:

• Møre barne- og ungdomsskule: Eirik Nødtvedt, Linde Ulstein og Vegard Nødtvedt.
• Frei ungdomsskole: Johanne Fjærli Bremnes, Even Opdahl og Olve Gryt.
• Bergmo ungdomsskole: Adrian Rumy Cruz-Drågen, Astrid Gunnerød Antonsen og Joel Bendiksen.
• Kolvikbakken ungdomsskole: Thomas Brunstad, Alina Leirvik og Maria V. Skorpen.

Her kan du høyre alle episodane av Klassequizen:

Rekordmange påmelde

Aldri før har så mange vore påmelde til NRK sin kunnskapskonkurranse Klassequizen i Møre og Romsdal. Heile 51 skular er med frå Smøla i nord til Åheim i sør.

– Det er så stas at så mange vil delta. Vi gler oss til å besøke så mange skular, seier programleiar for Klassequizen Janne Brit Aasen.

I månadane fram mot jul reiser ho på kryss og tvers i fylket vårt for å quizze tiandeklassingar.

– Eg er superimponert av elevane. Kunnskapsnivået er knallhøgt, i tillegg er det veldig kjekt å få bli kjent med så mange kjekke ungdomar.

Slik fungerer Klassequizen

Klassequizen er ein nasjonal kunnskapskonkurranse for 10. trinn. Den starta så smått på Sørlandet, og i år blir den arrangert for 11. gong der heile landet er med.

Kvar skule stille med eitt lag på tre personar. Dei skal svare på 12 spørsmål, delt opp i fire kategoriar. Elevane får 30 sekund til å svare på kvar kategori og dei har ingen hjelpemiddel.

Fylkesrunden blir avrunda med ein finale der dei to beste skulane får reise til landsfinalen.

Vinnaren der får det gjeve Klassequiz-trofeet. I tillegg kjem radiokanalen NRK mP3 til vinnarskulen og sender eit eige show direkte frå skulen. Dette blir sendt både på TV og radio.

– Eg håper sjølvsagt at eit av våre lag vinn heile greia, seier programleiaren.

Til landsfinalen

I 2023 var det Sula ungdomsskule og Frei ungdomsskole som stakk av med sigeren og gjekk vidare til landsfinalen. Til slutt var det Alstad ungdomsskule frå Nordland som gjekk av med sigeren etter landsfinalen.

Slik har skulane klart seg så langt. Det er 12 moglege poeng.