Green Highway er eit prosjekt for å skape ein grøn transportkorridor, med laddestasjonar for el-bilar langs heile vegen. Sundsvall, Östersund og Trondheim samarbeider for å utvikle infrastruktur som kan gjere det mogleg å bruke el-bil over lengre strekningar.
Kva meiner du? Er vi modne for ein overgang til el-bil? Skriv di meining i kommentarfeltet under artikkelen.
– Eg ser ingen grunn til at denne vegen frå Sundsvall skal stoppe i Trondheim. Denne satsinga kan forlengast til Kristiansund, seier dagleg leiar i Profero, Gisle Bakkeli.
Profero er eit selskap som driv utvikling og nyskaping, i samarbeid med offentlege og private aktørar på Nordmøre.
– Fleire må vere med
På strekninga mellom Trondheim og Sundsvall er det i dag ladestasjonar langs heile vegen. Bakkeli seier det ville vere uproblematisk å forlenge strekninga til Kristiansund.
– Der er ei satsing nasjonalt og internasjonalt for å nå klimamåla. Då er det ikkje nok med berre eit renseanlegg på Mongstad. Då må fleire vere med i eit løft. På sikt må vi køyre andre typar bilar enn i dag, seier Bakkeli.
– Samarbeid må til
Green Highway kan etablerast raskt i nye område om aktørane kjem på banen, seier Bakkeli. Han peikar på fleire partar som bør inngå i samarbeid.
– Kommunane må samarbeide om dette. Næringslivet må også vere med og kraftselskapa må sjå at dette er mogleg å få til. Då kan strekninga utviklast til å bli ei miljømessig fin strekning å køyre, seier Bakkeli.