Planane om å løfte jordbærnæringa i Valldals-regionen ved å inspirere nye til å gå i gang med bærdyrking, har fått kjeppar i hjula.
Kassa hos Innovasjon Norge var altså tom for pengar for i år då Valldal Grønt og Landbruk Nordvest søkt om bygdeutviklingsmidlar for å ta planane vidare.
– Ja, du kan kanskje seie det var ein tabbe å vente med søknaden til årets jordbærsesong var over. Når kassa er tom, må vi innstille oss på at hovudprosjektet blir eitt år forseinka, seier dagleg leiar Harald Valle i Valldal Grønt.
Om det ikkje blir fleire jordbærdyrkarar neste sesong, kan det bli langt fleire render med jordbærplanter hos nyrekrutterte produsentar i 2017, meiner Harald Valle i Valldal Grønt.
Foto: PrivatPengane skulle gå til tettare rådgjeving og oppfølging av dei åtte–ni personane som er seriøst interesserte i å starte med jordbærproduksjon.
Noreg treng meir bær
Jordbærbygda Valldal er den største produsenten av jordbær til syltetøy og saft her i landet, og leverer rundt 600 tonn bær i året.
Stadig fleire ønskjer norsk bær både til privat bruk og til industrien. Dette gjer at det trengst fleire bærdyrkarar.
– For saft- og syltetøy-industrien, dekker norsk bær no under 20 prosent av behovet. Difor er det store moglegheiter for den som går i gang med jordbærdyrking, sa Harald Valle til NRK då forprosjektet kom i gang tidlegare i år.
Syn som dette bør det bli langt meir av i Valldal og området rundt, meiner jordbærmiljøet i bygda.
Foto: Ole-Christian Olsen / NRKNær 400 eigarar av jordeigedomar i Rauma, Vestnes, Ørskog, Norddal og Stordal blei inviterte til fleire informasjonsmøte om bærdyrking. Til slutt stod dei igjen med åtte–ni personar, som ønskjer å gå inn i næringa. Og dei vil gjerne kome i gang så raskt som råd.
Prosjektet siktar også inn på å få dei som alt har åkrar i Valldals-området, til å utvide arealet.
Stor rift om bygdeutviklingsmidlane
Bjarne Øygard ved moldekontoret til Innovasjon Norge, seier det er stor rift om pengar frå bygdeutviklingsmidlar i Møre og Romsdal.
Foto: Innovasjon NorgeInnovasjon Norge hadde 36 millionar kroner i potten for bygdeutvikling i Møre og Romsdal for i år. No må altså valldalingane vente til neste år før dei kan søkje om dei 1,5 millionane dei treng for å føre rekrutteringsprosjektet vidare.
– Kvart år opplever vi svært stor pågang etter midlane for bygdeutvikling.Vi behandlar søknadane om tildeling etter kvart som dei kjem inn, og diverre blei heile kassa raskt tom også i år, stadfester Bjarne Øygard, seniorrådgjevar i Innovasjon Norge.
Bjarne Øygard vil ikkje forskottere tildeling til Valldals-prosjektet frå potten neste år, men lovar at jordbærsaka kjem til å bli behandla tidleg på nyåret.
