Stadig fleire stengde hotellrom

Den pågåande hotellstreiken byrjar no å gi seg utslag i stadig færre overnattingsmoglegheiter.

Stengde dører

Hundrevis av hotellrom er alt stengde og framover vert det fleire stengde dører.

Foto: Wilhelm Støylen / NRK

Fleire hotell i Møre og Romsdal har eller skal snart stenge heilt for overnattande. Laurdag gjekk nær 400 tilsette ved hotell, restaurantar og kantiner i fylket ut i streik.

Quality Ulstein Hotel stengde for overnattande søndag. I følgje Sunnmørsposten stengjer Thon Hotel Ålesund sine 106 rom på onsdag medan Scandic Parken Hotell i Ålesund stenger dørene på fredag.

LES OGSÅ: No streikar 400 hotell- og restauranttilsette i fylket

Tek ein dag om gongen

Ved Scandic Seilet i Molde er det 55 rom som er stengde no, dei har vore stengde sidan laurdag, då streiken begynte her i fylket.

Distriktsdirektør Gry Eriksen seier:

Distriktsredaktør i Scandic Gry Eriksen

Distriktsredaktør i Scandic, Gry Eriksen.

Foto: Privat

– Vi er i ei kartleggingsfase no, vi tek ein dag av gangen, men vi må gjere enkelte driftstilpasningar: redusere romkapasitet, og gjerne ha noko enklare bespisning, seier ho.

– Kan det bli fleire stengde rom?

– Det kan skje, vi tek ein dag av gangen og ser kva for ressursar vi har, seier ho.

God stemning blant dei streikande

Utanfor Scanic Parken Hotell i Ålesund sit det streikevakter frå morgon til kveld. Jeanette Simonsen er ei av dei. Og ho synest det er heilt greitt å sitte utanfor hotellet.

Jeanette Simonsen er streikevakt ved Scandic Parken Hotell i Ålesund.

Jeanette Simonsen er streikevakt ved Scandic Parken Hotell i Ålesund.

Foto: Wilhelm Støylen / NRK

– Det er berre koseleg å sitte her å vere streikevakt. Folk som går forbi er berre hyggelege og støttande, seier ho smilande.

Men ho synest ikkje det er kjekt at hotellet frå i morgon, onsdag, av ikkje tek imot fleire gjestar.

– Det synest eg er veldig trist. Eg skulle gjerne ønskje at streiken var over og vi kunne kome oss tilbake i vanleg jobb.

Fryktar langvarig streik

Situasjonen mange stadar er at ein del av dei tilsette er i streik. Men ikkje alle. Konsekvensen er ofte redusert drift.

Jon Arild Birkeland

Direktør Jon Arild Birkeland ved Angvik Gamle Handelsted

Foto: NRK

Angvik Gamle Handelsted har 37 rom. No er fire av dei tilsette i streik og direktør Jon Arild Birkeland fortel at det får konsekvensar:

– Vi har litt redusert drift. Då streiken starta, stoppa vi bookinga 14 dagar fram i tid, for å konsentrere oss om å levere til dei som allereie har bestilt. For augneblinken avgrensar vi det til det, og gjer så godt vi kan for dei gjestane.

Fryktar du langvarig streik?

– Ja, det gjer eg vel. Det verste som kan skje på lang sikt er jo at dette svekker renommeet til reiselivet i Norge, når vi begynner å nærme oss turistsesong. Så eg håper jo det ikkje blir langvarig, men eg fryktar det, seier Jon Arild Birkeland til NRK.