Houdini haika to mil til kjøpesenteret

Vektarane ved kjøpesenteret vart svært forundra då dei fann ein kanin i garasjeanlegget på Moa i Ålesund.

– Vi fann han mellom bilane. Det vart ein springerunde for å fange han, seier Fredrik Johansen i Nokas. Eit bilde av kaninen vart lagt ut på Facebook, og han vart plassert i dyrebutikken.

Johansen seier at dei kjem borti mykje rart på kjøpesenteret, men ein kanin på rømmen er noko av det mest spesielle dei har handtert.

Reiste to mil

Det var mange teoriar om kva som hadde skjedd. Men folk frå Langevåg i nabokommunen Sula kjende att den sosiale kaninen. For dei var det inga overrasking at han var lysten på å ta seg ein bytur.

Spørsmålet var korleis han hadde kome seg til kjøpesenteret to mil unna.

Sandra Veddeng Raknes frå Langevåg melde seg. Ho meiner å vite kva som har skjedd.

– Han må ha blitt med bilen vår då vi drog til Moa laurdag, seier ho. Kaninen vart funnen i området der ho sette frå seg bilen.

Gøymer seg under bilar

Gjennom helga budde kaninen i eit bur på dyrebutikken på Moa. – Vi har blitt veldig glade i han. Vi kallar han Nokas, seier Eva Cathrine Asbjørnsen ved Zoo-1.

– Han heiter Houdini, fortel Sandra Veddeng Raknes. Kaninen høyrer til i nabolaget hennar i Langevåg, der han ofte gøymer seg under bilane. No tar ho jobben med å frakte kaninen heim.

– Det er ei historie til å le av. Det er utruleg at ein kanin kan vere med ein bil i to mil på denne måten, seier ho.

Ho trur han har funne seg ein plass under eit deksel ved motoren, og blitt med på handletur.

På dyrebutikken blir kaninen lagt oppi ei pappkasse, og så er det slutt på kjøpesentereventyret. No blir det ein ny køyretur. Langhelga i Ålesund er over.