– Det er stadig vekk svaner som går på lina her. For kort tid sidan var det to svaner som blei råka i løpet av tre-fire dagar.
Kjell Mork Soot følgjer nøye med gjennom kikkerten. Han er leiar i Sunnmøre Ringmerkingsgruppe. Fuglane har vore ein viktig del av livet hans. Han har brukt tusenvis av timar på å ringmerke fuglar og er ein av dei fremste på dette området.
No er han uroa. Soot bur nemleg rett ved Grimstadvatnet naturreservat i Hareid, der ein stadig vekk finn døde svaner. Dei har mista livet i møtet med høgspentlina som går gjennom naturreservatet.
For ein fugleentusiast er det eit trist syn å sjå.
– Til saman er det kring ti svaner som har mista livet her dei siste åra, seier Soot.
- Der er gode nyheiter for fugleentusiastar også! Ein svært karakteristisk fjørball er det nemleg rekordmange av i norske skogar nett no.
– Legg lina i kabel
No er kravet frå grunneigarane i området at to kilometer av høgspentlina blir lagt i kabel i jorda. Dei vil ha slutt på at svanene blir råka på denne måten.
Og han som har ansvaret for linenettet i dette området, har fått med seg saka som først blei omtalt i Sunnmørsposten. Administrerande direktør i Linja AS, Rune Kiperberg, seier dei tar problemet på høgste alvor.
– Det kan sjå ut som dette problemet er større enn det vi har trudd tidlegare. Vi er sjølvsagt opptatt av dyrevelferd. Korleis vi påverkar nærmiljøet vårt er viktig for oss.
- Hugsar du kjendissvanen Hamnesjefen? Då eit museum ville stille han ut for å illustrere konflika mellom menneske og natur, var liket søkk borte...
Nede ved Grimstadvatnet er det registrert kring 50 svaner. Men det er ikkje berre svanene som uroar fugleeksperten. No har han registrert eit tranepar i området.
– Ho driv og beitar rett under høgspentlina saman med ungane sine. Eg er redd for at denne storfuglen kan gå på lina allereie i sommar, seier Soot.
Grunneigarane vil at lina skal bli lagt i kabel i jorda. Nettselskapet har sett på ulike måtar å løyse problemet på, og Kiperberg seier dei vil vurdere når det er fornuftig å gjere den investeringa som er naudsynt ut frå ei totalvurdering
– Det er ei ganske stor investering på mange millionar kroner. Men det er ikkje avgjerande åleine. Vi må og sjå på dette i forhold til korleis vår infrastruktur påverkar omgjevnadane, seier han.
- Svanene i Hareid måtte bøte med livet, men ein heilt spesiell ein dukka opp i Bergen for nokre år sidan. Den er verkeleg verd å sjå.