Ein stor flokk ungdommar hamnar i sjøen i Ålesund. I dag er dei trygge. Dei har våtdrakt og redningsvest.
Men til no i år har rekordmange 53 personar i Noreg mista livet i drukning. For heile året er det rekna med at nesten eitt hundre personar kjem til å drukne. Målet er at dette talet skal vere null. Kvart einaste år.
– Gøy og viktig
Ungdommane som ligg i vatnet i Ålesund er med på eit prosjekt som skal gjere denne visjonen til ein realitet.
– Dette er gøy. Og med tanke på kor mange det er som druknar, så er det bra at vi får lære meir om livredning. Vi blir også betre til å symje sjølve når vi held på med dette, seier niandeklassingen Oliver Hope.
Trygg i vatn
Regjeringa har vedteke ein nullvisjon for drukning i Noreg. Og Redningsselskapet følgjer opp. Organisasjonen har utvikla prosjektet Trygg i Vatn. Dette er utvikla for niandeklassingar. Målet er å auke kunnskapen og evnene til å klare seg i og ved vatn.
– Vi er svært uroa over at drukningstala stig i kystnasjonen Noreg. Vi må gjere ein større og betre innsats for å førebygge ulukker, seier Grethe Herlovsen, Generalsekretær i Redningsselskapet.
– Utfordring
No har kravet om opplæring i livredning også kome inn i den nasjonale læreplanen for grunnskulen. Der er det eit krav om at ungdomsskuleelevar skal forstå og gjennomføre livberging i vatn, i naturen. Det er opp til kvar skule å finne ut korleis opplæringa i livredning skal skje. Og det er krevjande å få til ei god og trygg opplæring.
– Eg ser mørkt på å måtte betale dette frå eige budsjett. Skulane har ein stram økonomi. Her har redningsselskapet med seg utstyr for ein million kroner. Slikt er ikkje lett å få til på eit stramt skulebudsjett, seier Camilla Lorge Viddal, rektor ved Ellingsøy barne- og ungdomsskole i Ålesund.
Redningsselskapet vil gjerne stå for både utstyr, instruktørar og det ein elles treng for ei slik opplæring. Men også denne organisasjonen ser at skulane har trong økonomi.
– Til denne forma for undervisning trengst det mykje utstyr, det må vere kompetente instruktørar, transport og logistikk. Det er vanskeleg for skulane å klare alt dette, seier Grethe Herlovsen i Redningsselskapet.
Forsøker å overtyde politikarane
Denne dagen var også politikarar frå Ålesund og nabokommunane inviterte til å sjå korleis niandeklassingane kan undervisast i livredning. Alle politikarane som var til stades på flytebrygga hadde berre positive ord å seie om det dei såg.
– I eit kystområde som vårt er dette viktig for å sikre liv, seier kommunestyrerepresentant Henriette Bryn (Ap).
– Dette er ein vinn, vinn situasjon for elevane, for kommunen, Redningsselskapet og helsa, seier Hans Ketil Knudsen (Ålesundlista).
– Dette er kjempeflott. Det har høg kvalitet og god effektivitet, seier Tore Johan Øvstebø (KrF).
– Å vere sjøvant kan redde liv. Eg har sjølv falle i sjøen i februar utan redningsvest. Det å ha kunnskap om korleis ein kan handtere ein slik situasjon kan redde liv, seier Monica Molvær (H).
Gøy skuledag
Generalsekretær i Redningsselskapet seier at prosjektet «Trygg i Vatn» er eit tilbod., men at det viktigaste er ikkje at det er akkurat denne løysinga kommunane vel.
– Ja, vi har laga eit opplegg for skulane. Men vi er aller mest opptekne av at politikarane skal setje skulane i stand til å oppfylle denne delen av læreplanen.
Og for skuleelevane blei dette ein annleis skuledag.
– Dette var gøy. Det er gøy å bade. Eg var overraska over at det ikkje var kaldare. Og det er bra at vi får lære meir om livredning, seier niandeklassingen Oliver Hope.