Han driv limousinutleige i ei bygd med 260 innbyggjarar

Den siste originalen i bygda, kallar han seg. Når cruiseskipa stemner inn Geirangerfjorden og folket strøymer i land, står Hallgeir Greger klar og tar i mot.

Hos limousin-gründeren frå Eidsdal på Sunnmøre kan kundane nyte naturen på første klasse. Og det står ikkje på entusiasmen.

– Mitt hovudmål i livet er å få folk til å oppdaga meir av verdsarvområdet enn berre Geiranger, seier Hallgeir Greger.

For all del, han har ikkje eit vondt ord å seie om turistbygda. Men det er så mykje meir å sjå, meiner han.

– Eg ønskjer at dei stansar opp og ikkje reiser så raskt vidare. At dei blir verande nokre dagar, rett og slett.

Vil gi turistane det vesle ekstra

I ti år har 54-åringen drive sitt eige limousin-selskap, i ei bygd med 260 innbyggjarar. I garasjen finst både ein Lincoln towncar frå 1993 og aller gjævast: Ein Cadillac Fleetwood 1992-modell.

Denne veka har han vore på EU-kontroll. 1. april skal bilane vere klare for ein ny sesong.

– Bilen er godkjent, så no er eg i startgropa. Eg har ikkje vinterdekk, så eg ventar til eg er sikker på at snøen er borte, seier han.

På sikt ønskjer han å utvide med eit eige reiseselskap. Men førebels er det limousinar og guiding som gjeld. Standardturen går til spektakulære Ørnesvingen og Flydalsjuvet, men dei som har tid, får noko heilt spesielt.

– Hos meg får dei ein tur til himmelriket, slik eg ser det. Turistar i dag vil ha noko eige, dei vil ikkje berre stå i kø. Eg viser dei små perler dei ikkje visste om.

Trur på sesongen i år

To liter på mila. Dyre reparasjonar. Vanskar med å finne parkeringsplass. Dårleg ver. Lista over hindringar er lang. Men for optimisten Hallgeir handlar det mest om moglegheiter.

– Eg har fått nytt bookingsystem, slik at turistane kan site i stova si og ta kontakt med meg. Eg har alt fått mange bestillingar, så eg har tru på sesongen i år.