– Det er utilgiveleg at slikt skjer. Det er mitt ansvar at setlane til dei ulike partia skal vere her, så vi legg oss heilt flate, seier leiar for stemmestyret i Bjerkelund krets, Per Kvalvik.
Problemet vart løyst etter rundt ein kvarters tid, då Venstre-setlane endeleg dukka opp. Det viste seg at setlane hadde hamna i stemmelokalet til Rensvik krets, slik at ein der hadde dobbelt opp med Venstre-setlar.
– Vi vurderte først å stengje lokalet, men det gjorde vi ikkje fordi det gjekk så kort tid frå då vi oppdaga feilen til vi fekk retta den. Vi sendte ein valfunksjonær til Rensvik krets, og fekk dermed henta setlane vi trengte, seier Per Kvalvik.
– Håpar det ikkje får noko å seie
Som Venstre sin førstekandidat til stortingsvalet frå Møre og Romsdal, blei Pål Farstad sjokkert då han fekk vite at stemmelistene til partiet hans ikkje var å finne i vallokalet til Bjerkelund krets.
– Det er sjølvsagt både alvorleg og kritikkverdig når ikkje alt er på plass i vallokalet når folk kjem for å stemme. Eg håpar at dette kom i orden igjen så raskt at det ikkje får noko å seie for stemmegivinga.
– Men det veit ein jo diverre ikkje, sa ein oppgitt Pål Farstad til NRK Møre og Romsdal etter at tabben blei kjent.