Det har regna heftig fleire stader i Møre og Romsdal torsdag kveld. På Leikong i Herøy er det ekstrem vassføring i elvene i området. To elver har gått over breiddene sine, ifylgje brannvesenet.
– Vi har mykje mannskap ute. No skaffar brannvesenet seg oversikt og lagar ei prioritering, seier teamleiar John-Rune Lillebø ved 110-sentralen.
Det er husa i område Leikongvegen og Jøsokvegen som står i fare for å bli ramma av vasskadar. Det er også fare for at vegen kan bli skadd.
Ifylgje Vestlandsnytt har det også gått eit jordskred i Aurvåg-området. Skredet har ført til at eit tre velta over kraftlinja.
I Ulsteinvik har brannvesenet rykt ut til to bustader som har fått vatn i kjellarane.Det har også kome vatn inn i biblioteket i Vikemyra og eit bygg i Sjøgata har fått inn vatn.
I Spjelkavik i Ålesund har eit bustadhus fått vatn i kjellaren.
Brannvesenet ber folk om å kontrollere utvendige slukar og avløp for å hindre vassinntrenging. Fleire stader i fylket er det store nedbørsmengder.