Egg frå Sunnmøre skal redde fattige på Zanzibar

– Eg er jo ein mann med ein vill idé. Eg blir sett på som ein original og kanskje ein tulling av enkelte. Men så kjem det inn ekspertar i biletet som ser potensialet i prosjektet. Brått blir det ein realitet, seier John John Bruseth til NRK.

Ålesundaren har lenge engasjert seg for Afrika, der han også har budd. Fargeklatten, som mellom anna er kjent som musikar og politikar, har også prøvd seg på prosjekt i Afrika som ikkje har gått så bra.

Hadde berre kvite plommer

Men Bruseth sitt selskap Johooo, der også skodespelaren Mari Maurstad sit i styret, satsar denne gongen på egg frå Sunnmøre.

Det trengst ei forklaring:

I alle dei år hadde det berre vore egg med kvite eggeplommer på Zanzibar, øya utanfor Tanzania på Afrikas austkyst. Dette fall ikkje i smak hos dei europeiske turistane, fortel Bruseth.

Derfor begynte hotella å importere egg med gule plommer frå land som Italia, Sør-Afrika og Brasil.

Men med det mista også mange av dei lokale eggprodusentane sitt inntektsgrunnlag.

Norges Vel vart med

Alt for fem år sidan sat John John Bruseth og funderte på korleis han kunne snu denne utviklinga.

Tre år seinare gjekk han tilfeldigvis forbi ein reklame for Sunnmørsegg, som sa dei hadde dei gulaste eggeplommene i Norge. Bruseth tok kontakt med drivaren Rune Haram.

I løpet av dei to siste åra har dei vore på Zanzibar og sett at egga kan få gule plommer ved å endre foret til hønene. Dessutan har dei sjekka marknadsgrunnlaget med hotella.

Prosjektet let seg endeleg realisere sist veke då John John Bruseth og Johooo fekk støtte frå Norges Vel, ein organisasjon som jobbar for å fremje livskraftige lokalsamfunn både nasjonalt og internasjonalt.

– Her kan vi kjempe mot fattigdom samtidig som vi jobbar for matsikkerheit. Dessutan fører det til næringsutvikling og fremjar kvinnene på Zanzibar sine rettigheiter. Vi meiner det er eit stort potensial for Johooo sitt prosjekt, seier Reinaart Pretorius, utanlandssjef i Norges Vel.

Organisasjonen har tatt på seg å organisere prosjektet på Zanzibar.

Vil mangedoble inntektene

Men det er kvinnene på Zanzibar som skal styre produksjonen av egga. Dei vil ifølgje Bruseth kunne auke inntektene sine frå 15 til 50–100 dollar i månaden.

– Og auka inntekter til kvinnene vil igjen føre at dei får meir makt og likestillinga dermed blir betre, seier John John Bruseth.

Han kjem sjølv ikkje til å tene ei krone på prosjektet.

– Dette er rein idealisme. For meg er det ei meir enn stor nok glede å sjå at kvinnene på Zanzibar får betre kår, seier Bruseth.